धरणगाव-लाईव्ह ट्रेंड्स न्यूज प्रतिनिधी । जळगाव जिल्ह्यात गेल्या काही दिवसांपासून पेट्रोल आणि डिझेल टंचाईची समस्या अधिक गंभीर बनत असताना आता या प्रश्नावरून राजकीय वातावरणही तापू लागले आहे. धरणगाव शहरात आज शिवसेना उद्धव बाळासाहेब ठाकरे गटाच्या वतीने पेट्रोल-डिझेल टंचाईच्या निषेधार्थ जोरदार आंदोलन करण्यात आले. केंद्र आणि राज्य सरकारविरोधात तीव्र घोषणाबाजी करत आंदोलनकर्त्यांनी इंधन पुरवठा तातडीने सुरळीत करण्याची मागणी केली. विशेष म्हणजे, पेट्रोल पंपावर तासन्तास प्रतीक्षा करणाऱ्या नागरिकांना चॉकलेट वाटून अनोख्या पद्धतीने निषेध व्यक्त करण्यात आला.
जळगाव जिल्ह्यातील अनेक पेट्रोल पंपांवर गेल्या काही दिवसांपासून पेट्रोल आणि डिझेलचा पुरवठा विस्कळीत होत असल्याने वाहनधारकांसह शेतकरी वर्ग मोठ्या अडचणीत सापडला आहे. पेट्रोल पंपांवर वाहनांच्या रांगा वाढताना दिसत असून इंधनासाठी नागरिकांना दीर्घकाळ प्रतीक्षा करावी लागत आहे. या पार्श्वभूमीवर धरणगावातील एका पेट्रोल पंपावर शिवसेना ठाकरे गटाने तीव्र आंदोलन छेडले.
आंदोलनादरम्यान पदाधिकाऱ्यांनी राज्य आणि केंद्र सरकारवर जोरदार टीका करत पेट्रोल-डिझेल टंचाईबाबत सरकार अपयशी ठरल्याचा आरोप केला. केंद्र सरकारच्या परराष्ट्र धोरणातील चुकीच्या निर्णयांमुळे देशासह राज्यात इंधनटंचाईची परिस्थिती निर्माण झाल्याचा आरोप आंदोलनकर्त्यांनी केला. यावेळी “शेतकऱ्यांना डिझेल द्या”, “इंधनटंचाई तात्काळ दूर करा” अशा घोषणांनी परिसर दणाणून गेला.
सध्या शेती मशागतीच्या दृष्टीने अत्यंत महत्त्वाचा कालावधी सुरू असून अनेक शेतकरी डिझेलवर चालणाऱ्या यंत्रसामग्रीवर अवलंबून आहेत. ट्रॅक्टर, पंप, शेतीची मशागत आणि इतर कामांसाठी डिझेलची मोठ्या प्रमाणावर गरज असते. मात्र डिझेल उपलब्ध होत नसल्यामुळे शेतीचे नियोजन विस्कळीत होण्याची भीती निर्माण झाली आहे. यामुळे आगामी हंगामावर त्याचा थेट परिणाम होऊ शकतो, अशी चिंता आंदोलनकर्त्यांनी व्यक्त केली.
धरणगावातील आंदोलनात सहभागी झालेल्या शिवसेना ठाकरे गटाच्या पदाधिकाऱ्यांनी सरकारला थेट इशारा देत पुढील आठ दिवसांत पेट्रोल आणि डिझेलचा पुरवठा सुरळीत न झाल्यास जळगाव जिल्हाभर व्यापक आंदोलन उभारण्यात येईल, असा इशारा दिला. या आंदोलनात शेतकरी, शिवसैनिक आणि नागरिकांनीही सहभाग घेतला. दरम्यान, पेट्रोल पंपांवर इंधनासाठी थांबलेल्या नागरिकांना चॉकलेट वाटून आंदोलनकर्त्यांनी अनोख्या पद्धतीने प्रशासनाचे लक्ष वेधण्याचा प्रयत्न केला. नागरिकांनाही यामुळे काहीसा दिलासा मिळाला, तर आंदोलनाने पेट्रोल-डिझेल टंचाईच्या प्रश्नाला जिल्हाभरात अधिक तीव्रतेने पुढे आणले आहे.
