जळगाव-लाईव्ह ट्रेंडस न्यूज प्रतिनिधी । जळगाव येथील शासकीय वैद्यकीय महाविद्यालयात उपचारासाठी दाखल करण्यात आलेल्या रुग्णाचा मृत्यू झाल्यानंतर, शवविच्छेदनासाठी नातेवाईकांना करावा लागलेला विलंब मोठा वादाचा विषय ठरला आहे. या प्रकारामुळे संतप्त झालेल्या नातेवाईकांनी रुग्णालय प्रशासनावर मनमानी कारभाराचा आरोप करत प्रशासकीय कामकाजावर प्रश्नचिन्ह उपस्थित केले आहे.
धरणगाव तालुक्यातील जांभोरा येथील श्याम नामदेव मोरे यांना जळालेल्या अवस्थेत उपचारार्थ जळगावच्या शासकीय वैद्यकीय महाविद्यालयात दाखल करण्यात आले होते. दुर्दैवाने, बुधवारी २२ एप्रिल रोजी सायंकाळी ६ वाजता उपचारादरम्यान त्यांची प्राणज्योत मालवली. रुग्णाच्या निधनाने कुटुंबीयांवर दुःखाचा डोंगर कोसळला असतानाच, त्यांना आणखी एका मानसिक त्रासाला सामोरे जावे लागले. मृतदेह शवविच्छेदनासाठी नेल्यानंतर तेथील काही अधिकारी व कर्मचाऱ्यांनी केलेल्या दिरंगाईमुळे नातेवाईकांचा संताप अनावर झाला.
मृताचे नातेवाईक कैलास पंडित गुजर आणि सागर परदेशी यांनी गंभीर आरोप करत सांगितले की, संबंधित महिला वैद्यकीय अधिकाऱ्यांनी नातेवाईकांशी अत्यंत अरेरावीची भाषा केली आणि त्यांना बाहेर काढले. “वरिष्ठांचे धाक नसल्यामुळेच येथे मनमानी कारभार सुरू आहे,” असा आरोपही त्यांनी केला. अखेर, बराच वेळ उलटून गेल्यानंतर शवविच्छेदन पार पडले, परंतु तोपर्यंत नातेवाईक प्रशासनाच्या या कारभाराविरुद्ध आक्रमक झाले होते. त्यांनी संबंधित अधिकारी व कर्मचाऱ्यांवर कायदेशीर कारवाई करण्याची मागणी केली असून, या प्रकरणाची तक्रार वरिष्ठ स्तरावर करणार असल्याचे स्पष्ट केले आहे.
दुसरीकडे, या आरोपांवर स्पष्टीकरण देताना शवविच्छेदन विभाग प्रमुख डॉ. रमेश वासनिक यांनी सांगितले की, शवविच्छेदनासाठी लागणाऱ्या प्रक्रियेत काही तांत्रिक अडचणी आल्या होत्या. मयताची नोंदणी करण्यासाठी वापरल्या जाणाऱ्या सॉफ्टवेअरमध्ये तांत्रिक बिघाड किंवा प्रक्रिया सुरू असल्याने माहिती लोड होण्यास वेळ लागला आणि त्यामुळेच शवविच्छेदन प्रक्रियेस विलंब झाला.
सरकारी रुग्णालयातील प्रशासकीय दिरंगाईचा फटका सामान्यांना बसत असल्याचा हा प्रकार आता चर्चेचा विषय ठरला आहे. या प्रकरणाची सखोल चौकशी करून दोषींवर कारवाई व्हावी, अशी मागणी जोर धरत आहे.
