मुंबई-लाईव्ह ट्रेंड्स न्यूज वृत्तसेवा । बॉलिवूड अभिनेता अभिषेक बच्चन याने सोशल मीडियावरून आपल्या अत्यंत जवळच्या व्यक्तीच्या निधनाची दुःखद बातमी दिली आहे. त्याचे दीर्घकाळचे मेकअप आर्टिस्ट अशोक सावंत यांचे निधन झाले असून, अभिषेकने त्यांच्यासाठी लिहिलेली भावनिक पोस्ट सध्या सोशल मीडियावर सर्वत्र चर्चेत आहे.
अभिषेक बच्चनने आपल्या पोस्टमध्ये लिहिलं आहे की, “अशोक दादा आणि मी तब्बल २७ वर्षांहून अधिक काळ एकत्र काम केले आहे. माझ्या पहिल्या चित्रपटापासून त्यांनी माझा मेकअप केला. ते केवळ माझ्या टीमचा भाग नव्हते, तर माझ्या कुटुंबातीलच एक सदस्य होते.” अभिषेकने पुढे सांगितले की, “त्यांचे मोठे बंधू दीपक सावंत हे गेल्या ५० वर्षांपासून माझे वडील अमिताभ बच्चन यांच्यासाठी मेकअप आर्टिस्ट म्हणून कार्यरत आहेत. अशोक दादा काही वर्षांपासून तब्येतीच्या अडचणीत होते, त्यामुळे ते नेहमी सेटवर येऊ शकत नव्हते. पण तरीसुद्धा ते रोज माझी विचारपूस करायचे. माझा मेकअप व्यवस्थित झाला आहे का, हेही त्यांच्या असिस्टंटकडून तपासून घ्यायचे.”
अभिषेकने पुढे लिहिले, “ते अतिशय प्रेमळ, सज्जन आणि मनमिळाऊ व्यक्ती होते. त्यांच्या चेहऱ्यावर नेहमी हसू असायचं आणि एक उबदार मिठी देण्यासाठी ते सदैव तयार असायचे. त्यांच्या बॅगेत नेहमी खास चिवडा किंवा बाकरवडी असायची. काल रात्री त्यांचं निधन झालं आणि आज त्यांच्या अनुपस्थितीचं दु:ख मनाला चटका लावतंय.”
तो पुढे म्हणाला, “एखाद्या नवीन चित्रपटाचा पहिला शॉट देण्यापूर्वी मी ज्यांच्या पायाला स्पर्श करून आशीर्वाद घ्यायचो, ती पहिली व्यक्ती ते होते. आता यापुढे मला स्वर्गाकडे पाहावं लागेल आणि खात्री असेल की तुम्ही तिथून मला आशीर्वाद देत आहात.”
अभिषेकने आपल्या पोस्टच्या शेवटी लिहिले, “तुमचे प्रेम, काळजी, सन्मान, कला आणि तुमचं सदाबहार हास्य याबद्दल धन्यवाद दादा. यापुढे कामावर जाताना तुम्ही सोबत नसणार ही भावना अत्यंत वेदनादायी आहे. तुम्हाला शांती लाभो हीच प्रार्थना. आणि जेव्हा आपण पुन्हा भेटू, तेव्हा त्या उबदार मिठीची मी आतुरतेने वाट पाहीन.”
ही पोस्ट पाहून अनेक बॉलिवूड कलाकार आणि चाहत्यांनी अभिषेकच्या दुःखात आपली संवेदना व्यक्त केली आहे. मेकअप आर्टिस्ट अशोक सावंत यांनी अनेक नामांकित कलाकारांसोबत काम केले असून, त्यांची विनम्रता आणि समर्पणाने त्यांना उद्योगात एक वेगळं स्थान मिळवलं होतं.
अभिषेक बच्चनच्या या पोस्टमधून त्यांच्या आणि अशोक सावंत यांच्या नात्याची जिव्हाळ्याची झलक स्पष्ट दिसते. त्यांच्या निधनाने केवळ अभिषेकच नव्हे तर संपूर्ण बॉलिवूड परिवाराने एक प्रेमळ आणि कर्तव्यनिष्ठ व्यक्ती गमावली आहे.
