जळगाव – लाईव्ह ट्रेंड्स न्यूज प्रतिनिधी । जळगाव जिल्हा परिषदेअंतर्गत आरोग्य विभागातील विविध संवर्गातील १३ कर्मचाऱ्यांना बहुप्रतीक्षित पदोन्नती मिळाल्याने विभागात आनंदाचे वातावरण निर्माण झाले आहे. १० ऑक्टोबर रोजी जिल्हा परिषदेच्या मुख्य कार्यकारी अधिकारी मिनल करनवाल यांच्या उपस्थितीत समुपदेशनाद्वारे ही पदोन्नती प्रक्रिया पार पडली.
गेल्या काही महिन्यांपासून आरोग्य विभागातील पदोन्नती प्रक्रिया रखडली होती. अनेक कर्मचाऱ्यांचे प्रलंबित प्रस्ताव, तांत्रिक प्रक्रिया आणि प्रशासकीय अडचणींमुळे ही पदोन्नती लांबणीवर पडली होती. मात्र मुख्य कार्यकारी अधिकारी मिनल करनवाल यांनी या विषयाची गांभीर्याने दखल घेत तातडीने निर्णय घेऊन समुपदेशनाद्वारे पदस्थापना प्रक्रिया गतिमान केली. त्यांच्या मार्गदर्शनामुळे कर्मचाऱ्यांना प्रतीक्षित पदोन्नती मिळवता आली.
या प्रक्रियेत जिल्हा आरोग्य अधिकारी डॉ. सचिन भायेकर, सहाय्यक प्रशासन अधिकारी डी. एस. पाटील, कनिष्ठ प्रशासन अधिकारी माधवी शिंदे, तसेच कांतीलाल पाटील व मनोज पाटील यांनी संयोजन आणि नियोजनात मोलाची भूमिका बजावली. त्यांनी संपूर्ण प्रक्रिया पारदर्शक आणि सुचारू रित्या पार पाडून सर्व कर्मचाऱ्यांच्या अपेक्षांवर खरे उतरण्याचा प्रयत्न केला.
पदोन्नती मिळालेल्या कर्मचाऱ्यांमध्ये नवचैतन्य निर्माण झाले असून, पुढील काळात अधिक जोमाने, कार्यक्षमतेने आणि जबाबदारीने काम करण्याची तयारी त्यांनी दर्शवली आहे. यामुळे विभागीय कामकाजाच्या गुणवत्तेतही सुधारणा होण्याची अपेक्षा आहे.
आरोग्य विभागातील ही पदोन्नती प्रक्रिया इतर विभागांसाठीही मार्गदर्शक ठरेल, अशी भावना अनेक कर्मचाऱ्यांनी व्यक्त केली. जिल्हा परिषदेच्या प्रशासनाने वेळेवर निर्णय घेतल्यामुळे कर्मचारी वर्गामध्ये सकारात्मक वातावरण तयार झाले आहे.
