बेगूसराय: वृत्तसंस्था । मला सतत देशद्रोही म्हणत असाल, तर मी भारतीय जनता पक्षात प्रवेश करीन, असे म्हणत भारतीय कम्युनिस्ट पक्षाचे नेते आणि बिहार विधानसभा निवडणुकीतील पक्षाचे स्टार प्रचारक कन्हैया कुमार यांनी भाजपवर टीकेचे प्रहार केले आहेत.
बिहार विधानसभेला अजून काही कालावधी शिल्लक असला तरी भारतीय कम्युनिस्ट पक्षाचे स्टार प्रचारक कन्हैया कुमार मैदानात उतरले आहेत. कन्हैया कुमार यांनी आपला गृहजिल्हा बेगूसराय येथून निवडणूक अभियानाची सुरुवात केली आहे. कन्हैया कुमार यांचा एक व्हिडिओ सोशल मीडियावर व्हायरल झाला आहे. याच व्हायरल व्हिडिओत कन्हैया कुमार यांनी भाजपवर ही टीका केली आहे.
कन्हैया कुमार यांनी बगूसराय जिल्हयातील बखरी विधानसभा मतदारसंघातून सीपीआयचे उमेदवार सूर्यकांत पासवान आणि तेघडा येथील उमेदवार रामरतन सिंह यांचे नामांकन भरताना उपस्थित होते. नामांकनानंतर कन्हैया कुमार यांनी आयोजित सभेत भारतीय जनता पक्षावर टीकास्त्र सोडले. पूर्वी ईव्हीएम हॅक होत असे, आता तर भाजपचे लोक मुख्यमंत्र्यांनाच हॅक करत आहेत, असे कन्हैया कुमार म्हणाले.
कन्हैया कुमार म्हणाले की, ज्योतिरादित्य शिंदे काँग्रेसमध्ये होते तेव्हा ते वाईट होते. त्यांनी गंगेत डुबकी मारली तेव्हा पासून ते भाजपचे झाले. मी एके ठिकाणी बोललो आहे की मला जर तुम्ही सतत देशद्रोही-देशद्रोही म्हणाल… तर मी बोलेन की खबरदार… जर जास्तच बोललात तर मी भारतीय जनता पक्षात प्रवेश करीन. ज्यांना हे शिव्या देतात, ५ मिनिटानंतर ते काका म्हणायला सुरुवात करतात. कन्हैया कुमार यांचा हा व्हिडिओ सोशल मीडियावर व्हायरल झाला आहे.
जेएनयू विद्यार्थी संघटनेचे माजी अध्यक्ष कन्हैया कुमार हे बिहारमध्ये भारतीय कम्युनिस्ट पक्षाचे स्टार प्रचारक आहेत. कन्हैया कुमार हे बेगूसरायेचच रहिवासी आहेत. ते सीपीआयच्या राष्ट्रीय कार्यसमितीचे सदस्य देखील आहेत. कन्हैया कुमार यांनी बेगूसराय लोकसभा मतदारसंघातून निवडणूक लढवली होती. मात्र, भारतीय जनता पक्षाचे गिरिराज सिंह यांनी त्यांचा पराभव केला होता. बिहार विधानसभा निवडणूक लढवायची नाही, असे त्यांनी ठरवले आहे. सीपीआयच्या उमेदवारांचा ते बिहारमध्ये प्रचार करणार आहेत.
लोकसभा निवडणुकीवेळी बिहारमध्ये कन्हैया कुमार यांना राष्ट्रीय जनता दलाने साथ दिली नव्हती. भारतीय कम्युनिस्ट पक्ष हा एका जातीचा पक्ष आहे असे त्या वेळी एका मुलाखतीत तेजस्वी यादव यांनी म्हटले होते. तर, २०२० च्या विधानसभा निवडणुकीत सीपीआय महाआघाडीत सहभागी आहे. या पार्श्वभूमीवर महाआघाडीच्या उमेदवारांना विजयी बनवण्यासाठी तेजस्वी यादव आणि कन्हैया कुमार एकाच मंचावर दिसणार आहेत. तथापि, या दोघांचा अजूनही एकत्र कार्यक्रम झालेला नाही.
