वॉशिंग्टन वृत्तसंस्था । अमेरिकेत कोरोना संसर्गाचे थैमान सुरू असताना आणखी एका आजाराचा मोठा धोका निर्माण झाला आहे. मेंदू कुरतडणाऱ्या एका सुक्ष्मजंतूचा उद्रेक होण्याचा धोका आहे. नळाद्वारे होणाऱ्या पाणी पुरवठ्यात हा सुक्ष्मजंतू आढळल्यामुळे खळबळ उडाली आहे. टेक्सासमधील अनेक शहरांमध्ये नळाद्वारे येणारे पाणी न पिण्याचे निर्देश प्रशासनाने दिले आहेत.
टेक्सासमधील लेक जॅक्सन मध्ये एका बालकाचा मृत्यू या नायलेरिया फोवलेरी या अमिबामुळे झाल्याचे समोर आले. नळाद्वारे होणाऱ्या पाण्यात हा मेंदू कुरतडणारा अमिबा आढळला. त्यानंतर स्थानिकांना नळाद्वारे येणारे पाणी न पिण्याचे आवाहन करण्यात आले. पाण्याचे निर्जंतूकीकरण करण्यात आले. मात्र, तरीदेखील खबरदारी बाळगण्याचे आवाहन करण्यात आले आहे.
टेक्सासमध्ये आठ सप्टेंबर रोजी एका मुलाला रुग्णालयात दाखल करण्यात आले. त्यावेळीच्या वैद्यकीय तपासणीत सुक्ष्मजंतू आढळला. डॉक्टरांनी सांगितले की, या सुक्ष्मजंतूच्या संपर्कात आल्यामुळे जोशिया मॅकइंटायर या मुलाचा मृत्यू झाला. . नाक आणि तोंडावाटे हे पाणी शरीरात न जाऊ देण्याच्या सूचना देण्यात आल्या. लेक जॅक्सन, फ्रीपोर्ट, एंग्लटन, ब्रेजोरिया, रिचवुड, ऑयस्टर क्रीक, क्लूट आणि रोसेनबर्ग आदी भागात या सूचना देण्यात आल्या. पाणी उकळून प्यावे अशाही सूचना प्रशासनाने दिल्या आहेत.
हा सु्क्ष्मजंतू मेंदू खाणारा सुक्ष्म जीव आहे. या सुक्ष्मजंतूला नायलेरिया फोवलेरी असे म्हटले जाते. नाकाच्या माध्यमातून हा सुक्ष्मजंतू शरीरात प्रवेश करतो आणि मेंदूपर्यंत पोहचतो.
अमेरिकेत होणाऱ्या सार्वजनिक पाणी पुरवठ्यातून सुक्ष्मजंतू आढळणे ही दुर्मिळ बाब आहे. याआधीदेखील हा जंतू आढळला होता.अमेरिकेतील सार्वजनिक पाणी पुरवठा योजनेनुसार नळातून येणाऱ्या पाण्यात याआधीदेखील सुक्ष्मजंतू आढळला होता. वर्ष २०११ मध्ये आणि २०१३ मध्ये दक्षिण लुइसियानामध्ये मृत्यूची नोंद करण्यात आली होती.
त्याशिवाय वर्ष २००३ मध्ये एरिजोनामध्ये एक जिओ-थर्मल पाणी पुरवठा यंत्रणेतून होणाऱ्या पाण्यात सुक्ष्मंजतू आढळला होता. १९७०-८० च्या दशकात ऑस्ट्रेलिया आणि २००८ मध्ये पाकिस्तानमध्ये हा सुक्ष्मजंतू आढळला होता.
मेंदू कुरतडणारा हा सुक्ष्मजंतू माती, तलाव, नदी आदी ठिकाणी आढळतात. त्याशिवाय योग्यप्रकारे देखरेख न केल्यास जलतरण तलावातही हा सुक्ष्मजंतू आढळू शकतो.
