कोटा (राजस्थान) वृत्तसंस्था । कोटा जिल्ह्यात बुधवारी सकाळी एक दुर्दैवी घटना घडल्याचं समोर येतंय. चंबळ नदीत एक बोट उलटून मोठा अपघात घडलाय. या बोटीतून जवळपास ५० जण प्रवास करत होते. प्रवाशांत लहान मुलं आणि महिलांचाही समावेश होता.
बुंदी जिल्ह्याच्या सीमेवर गोठडा कला गावानजिक चंबळ नदीत ही घटना घडलीय. या बोटीत काही प्रवाशांशिवाय सामान आणि वाहनंही भरली गेली होती. बोटीतून प्रवासी बुंदी भागातील कमलेश्वर धामकडे जात होते. परंतु, नदीच्या मध्यभागात असतानाच बोट पलटली आणि हा अपघात घडला.
जवळपास २० जणांना वाचवण्यात यश आलंय. तर जवळपास सात मृतदेह पाण्यातून बाहेर काढले गेल्याची माहिती मिळतेय. मृतांमध्ये दोन महिला आणि चार पुरुषांचा समावेश आहे. उर्वरित प्रवाशांचा शोध अद्याप सुरू आहे. अपघातग्रस्त बोटीत अधिकांश वयस्कर व्यक्ती, महिला आणि मुलांचा समावेश होता. यातल्या बऱ्याच जणांना पोहताही येत नव्हतं. ही घटना बुधवारी सकाळी ९.०० वाजल्याच्या सुमारास घडल्याचं समजतंय.
यासंबंधी सूचना मिळाल्यानंतर जिल्हा प्रशासनानं तातडीनं हालचाली करत प्रवाशांना वाचवण्यासाठी रेस्क्यू ऑपरेशन सुरू केलं. घटनास्थळावर एसडीआरएफची रेस्क्यू टीम उपस्थित आहे. अॅम्ब्युलन्सलाही पाचारण करण्यात आलंय.
या घटनेवर लोकसभा अध्यक्ष ओम बिर्ला यांनीही दु:ख व्यक्त केलं. या ठिकाणी अवैध पद्धतीनं बोटींचं संचालन सुरू असल्याच्या तक्रारी आता समोर येत आहेत. या ठिकाणी बोटींचं संचालन सुरू असलं तरी कोणत्याही प्रकारच्या दुर्दैवी प्रसंगी बचावात्मक पद्धतीची कोणतीही सुविधा किंवा उपकरणं या ठिकाणी उपलब्ध नाही.
