वॉशिंग्टन: वृत्तसंस्था । काही दिवसांपासून अमेरिकेत सुरू असलेला सत्ता पेच सुटण्याचा मार्ग मोकळा झाला आहे. विद्यमान राष्ट्राध्यक्ष डोनाल्ड ट्रम्प यांनी अखेर सत्ता हस्तांतरणाला हिरवा कंदील दाखवला आहे.
सामान्य प्रशासन विभागाचे प्रमुख एमिली मर्फी यांनी नवनिर्वाचित राष्ट्राध्यक्ष जो बायडन यांना पत्र लिहून सत्ता हस्तांतरणाची प्रक्रिया पार पाडण्यास ट्रम्प प्रशासन राजी असल्याचे सांगितले.
अमेरिका राष्ट्राध्यक्षपदाच्या निवडणुकीत पराभव झाल्यानंतर डोनाल्ड ट्रम्प यांनी निकाल मान्य करण्यास नकार दिला. काही राज्यांमध्ये त्यांनी फेरमतमोजणीची मागणी केली. जॉर्जियामध्ये फेरमतमोजणीही झाली. मात्र, ट्रम्प यांना पुन्हा पराभवाचा धक्का बसला. त्यानंतरही ट्रम्प यांनी पराभव मान्य करण्यास नकार दिला होता. मतमोजणीच्या सुरुवातीच्या टप्प्यापासून ट्रम्प यांनी सातत्याने निवडणूक आणि मतमोजणीत गैरप्रकार झाल्याचा आरोप केला होता. बायडन यांनी बहुमताचा आकडा ओलांडल्यानंतरही सत्ता न सोडण्याचे संकेत ट्रम्प यांनी दिले होते. त्यामुळे सत्ता हस्तांतरणाचा पेच निर्माण झाला होता.
सामान्य प्रशासन सेवा विभागाचे प्रमुख एमिली मर्फी यांनी सत्ता हस्तांतरणासाठी आवश्यक असलेल्या प्रक्रिया पार पाडण्यास ट्रम्प प्रशासन तयार असल्याचे सांगितले. डेमोक्रॅटीक पक्षाच्या सदस्यांनी जो बायडन यांच्या विजयाबाबत भूमिका स्पष्ट करण्यासाठी एमिली मर्फी यांना सभागृहात बोलवले होते. त्यावेळी एमिली यांनी ही माहिती दिली. डोनाल्ड ट्रम्प यांनी एमिली आणि त्यांच्या सहकाऱ्यांना प्रोटोकॉलनुसार सत्ता हस्तांतरणाची प्रक्रिया पार पाडण्याची सुचना केली.
सत्ता हस्तांतरासाठी घटनात्मकदृष्ट्या आवश्यक व्यवस्था करण्यात आली आहे, असे ‘व्हाइट हाउस’कडून सांगण्यात आले होते. व्हाइट हाउसच्या प्रवक्त्या केलिघ मॅकएनानी यांनी काही दिवसांपूर्वीच पत्रकार परिषद घेतली होती. या पत्रकार परिषदेतही त्यांनी बायडन यांचा विजय मान्य करण्यास नकार दिला. ‘प्रत्येक वैध मताची मोजणी करायला हवी, असे अध्यक्ष ट्रम्प यांनी स्पष्ट शब्दांत सांगितले असल्याचे मॅकएनानी यांनी म्हटले होते.
