अमळनेर लाईव्ह ट्रेंडस न्यूज प्रतिनिधी । मारवड येथे नुकतेच पोलीस पाटील दिनानिमित्त जिल्ह्यातील पोलीस पाटलांची विशेष कार्यशाळा व कार्यक्रम घेण्यात आला. पोलीस व महसूल प्रशासनातील महत्वाचा दुवा म्हणून पोलीस पाटील पदाची जबाबदारी महत्त्वपूर्ण ठरते. गावपातळीवरील शांतता व कायदा-सुव्यवस्था राखण्यासाठी पोलीस पाटलांच्या योगदानाबद्दल या कार्यक्रमात विशेष गौरव करण्यात आला.
कार्यक्रमाला माजी मंत्री तथा आमदार अनिल पाटील यांनी उपस्थित राहून पोलीस पाटलांच्या कार्याचे कौतुक केले. त्यांनी सांगितले की, “पोलीस पाटील हे प्रशासकीय कामात महत्वाचा आधारस्तंभ ठरतात. गावपातळीवरील माहिती संकलन, आपत्ती व्यवस्थापन व कायद्याच्या अंमलबजावणीसाठी त्यांचे योगदान अमूल्य आहे.”
यावेळी आयोजित कार्यशाळेत नवीन फौजदारी कायदे, म्हणजेच भारतीय न्याय संहिता, भारतीय नागरी सुरक्षा संहिता आणि भारतीय साक्ष कायदा, तसेच अनुसूचित जाती-जमाती अत्याचार प्रतिबंध कायद्याच्या अंमलबजावणीविषयी सविस्तर माहिती देण्यात आली. प्रांताधिकारी नितीनकुमार मुंडावरे यांनी यावेळी पोलीस पाटील हे गावपातळीवरील कायदा व सुव्यवस्थेचे रक्षक असल्याचे सांगून त्यांच्या भूमिकेचे महत्त्व विषद केले.
प्रशासनाच्या मदतीसाठी उल्लेखनीय कार्य करणाऱ्या पोलीस पाटलांचा सन्मान प्रशस्तीपत्र देऊन करण्यात आला. तहसीलदार रुपेशकुमार सुराणा यांनी पोलीस पाटलांच्या कार्यामुळे प्रशासनाचे काम सुकर होत असल्याचे सांगितले आणि भविष्यातही त्यांच्याकडून सहकार्य अपेक्षित असल्याचे नमूद केले. मारवड पोलीस स्टेशनचे सहाय्यक पोलीस निरीक्षक जिभाऊ पाटील यांनी कायदा-सुव्यवस्था राखण्यात पोलीस पाटलांच्या भूमिकेची प्रशंसा केली. “त्यांच्या सहकार्यामुळे ग्रामीण भागातील गुन्हेगारी नियंत्रणात ठेवणे शक्य झाले आहे,” असे ते म्हणाले.
कार्यक्रमात खासदार स्मिता वाघ यांनी भेट दिली आणि पोलीस पाटलांना शुभेच्छा दिल्या. तसेच, शांतता समितीचे सदस्य पत्रकार वसंतराव पाटील, गटविकास अधिकारी नरेंद्र पाटील, जिल्ह्यातील पोलीस पाटील संघटनांचे प्रतिनिधी आणि विविध पदाधिकारी उपस्थित होते. सूत्रसंचालन पोलीस पाटील गणेश भामरे यांनी केले, तर प्रास्ताविक दत्तात्रय ठाकरे यांनी आणि आभार प्रदर्शन भाऊसाहेब पाटील यांनी केले. कार्यक्रमात महिला पोलीस पाटलांनीही मनोगत व्यक्त करून त्यांच्या भूमिकेचे महत्त्व अधोरेखित केले.
मारवड पोलीस पाटील मित्र परिवाराने कार्यक्रम यशस्वी करण्यासाठी परिश्रम घेतले. या कार्यक्रमाने पोलीस पाटलांच्या कार्याची महत्ता आणि गावपातळीवरील प्रशासनातील त्यांच्या भूमिकेचे महत्त्व अधोरेखित केले. मारवड, पाडळसरे व परिसरातील ग्रामस्थांसह जळगाव, धुळे व नंदुरबार जिल्ह्यातील पोलीस पाटील मोठ्या संख्येने उपस्थित होते. या उपक्रमाने पोलीस पाटलांच्या योगदानाची नवी दिशा व प्रेरणा मिळाली.
