भुसावळ-लाईव्ह ट्रेंड्स न्यूज प्रतिनिधी । भुसावळ औष्णिक विद्युत केंद्रातील दिव्यांग कोट्यातून सेवेत कार्यरत असलेल्या कर्मचाऱ्यांच्या दिव्यांग प्रमाणपत्रांची उच्चस्तरीय तपासणी करण्याचा मुद्दा पुन्हा एकदा ऐरणीवर आला आहे. राज्यभर बनावट दिव्यांग प्रमाणपत्रांच्या प्रकरणांची चौकशी सुरू असताना महाजेनकोच्या दीपनगर येथील औष्णिक विद्युत केंद्रात मात्र या संदर्भात व्यापक आणि निष्पक्ष तपासणी झालेली नसल्याची चर्चा आहे. त्यामुळे प्रशासन या प्रकरणाकडे नेमके कसे पाहते, याबाबत प्रश्न उपस्थित होत आहेत.
भुसावळ औष्णिक विद्युत केंद्राचे मुख्य अभियंता विराज चौधरी यांनी पदभार स्वीकारल्यानंतर प्रशासनातील अनावश्यक बाबींना आळा घालण्यासह विविध विषयांवर कठोर भूमिका घेतल्याची चर्चा आहे. मात्र, दिव्यांग कोट्यातून सेवेत दाखल झालेल्या कर्मचाऱ्यांच्या प्रमाणपत्रांची वैधता तपासण्याच्या मुद्द्यावर प्रशासनाची भूमिका अद्याप स्पष्ट झालेली नसल्याने या प्रकरणाला वेगळे महत्त्व प्राप्त झाले आहे.
राज्यात विविध शासकीय तसेच निमशासकीय आस्थापनांमध्ये दिव्यांग कोट्याचा लाभ घेऊन सेवेत दाखल झालेल्या कर्मचाऱ्यांच्या प्रमाणपत्रांची पडताळणी करण्याची प्रक्रिया सुरू आहे. काही ठिकाणी वैद्यकीय तपासणीनंतर प्रमाणपत्रांमध्ये अनियमितता आढळल्यास संबंधित कर्मचाऱ्यांवर सेवाविषयक कारवाई करण्यात आली असून, काही प्रकरणांत गुन्हेही दाखल झाल्याचे समोर आले आहे. त्यामुळे दीपनगर औष्णिक विद्युत केंद्रातील प्रमाणपत्रांचीही वस्तुनिष्ठ तपासणी करण्याची मागणी जोर धरत आहे.
सुमारे महिनाभरापूर्वी राष्ट्रवादी काँग्रेसचे ज्येष्ठ नेते एकनाथराव खडसे यांनी भुसावळ औष्णिक विद्युत केंद्रातील एका अभियंत्याच्या दिव्यांग प्रमाणपत्राबाबत प्रश्न उपस्थित केला होता. त्याचबरोबर केंद्रातील आणखी काही कर्मचाऱ्यांच्या प्रमाणपत्रांचीही तपासणी करण्याची आवश्यकता असल्याचे त्यांनी सूचित केले होते. या पार्श्वभूमीवर आता केंद्रातील दिव्यांग कोट्यातून कार्यरत असलेल्या सर्व श्रेणीतील कर्मचाऱ्यांच्या प्रमाणपत्रांची एकत्रित तपासणी करण्याची मागणी पुढे आली आहे.
या कर्मचाऱ्यांची राज्यस्तरीय विशेष वैद्यकीय मंडळामार्फत निष्पक्ष तपासणी केल्यास संबंधित प्रमाणपत्रांची सत्यता स्पष्ट होण्यास मदत होऊ शकते. तसेच पात्र आणि अपात्र लाभार्थ्यांबाबत वस्तुस्थिती समोर येऊन प्रशासनालाही पुढील कारवाई करणे सुलभ होईल. त्यामुळे कोणत्याही व्यक्तीवर थेट आरोप न करता अधिकृत वैद्यकीय तपासणीच्या माध्यमातून सत्य समोर आणणे आवश्यक असल्याचे मत व्यक्त केले जात आहे.
दरम्यान, अद्याप अशा प्रकारची व्यापक वैद्यकीय तपासणी झाल्याचे स्पष्ट झालेले नसल्याने मुख्य अभियंता विराज चौधरी यांच्या भूमिकेकडे लक्ष लागले आहे. प्रशासनाने या विषयावर अधिकृत भूमिका स्पष्ट करून प्रमाणपत्र तपासणीबाबत कोणती कार्यवाही करण्यात येणार आहे, याची माहिती द्यावी, अशी मागणी नागरिकांकडून होत आहे.
महाजेनको प्रशासनाने भुसावळ औष्णिक विद्युत केंद्रातील दिव्यांग कोट्यातून सेवेत कार्यरत असलेल्या सर्व श्रेणीतील कर्मचाऱ्यांच्या प्रमाणपत्रांची उच्चस्तरीय, पारदर्शक आणि निष्पक्ष वैद्यकीय तपासणी करावी, अशी मागणी जोर धरत आहे. तपासणीत कोणाचे प्रमाणपत्र बनावट, अवैध किंवा नियमबाह्य आढळल्यास संबंधितांवर नियमानुसार कठोर कारवाई करावी, अशीही मागणी करण्यात येत आहे.
या प्रकरणात मुख्य अभियंता विराज चौधरी तसेच महाजेनको प्रशासनाची अधिकृत भूमिका समोर आल्यानंतरच पुढील चित्र स्पष्ट होणार आहे. त्यामुळे दीपनगर औष्णिक विद्युत केंद्रातील दिव्यांग कोट्यातील कर्मचाऱ्यांच्या प्रमाणपत्रांची तपासणी केली जाणार का आणि केली असल्यास त्याचा अहवाल काय आहे, याकडे आता सर्वांचे लक्ष लागले आहे
