मुंबई – लाईव्ह ट्रेंड्स न्यूज वृत्तसेवा । भारतीय रेल्वेत भ्रष्टाचारविरोधी जनजागृती आणि नैतिक मूल्यांची जपणूक यासाठी दरवर्षी साजरा केला जाणारा ‘सतर्कता जागरूकता अभियान – २०२५’ यंदाही मोठ्या उत्साहात राबवण्यात येत आहे. या अभियानाचा भाग म्हणून मध्य रेल्वेच्या मुंबई विभागात “सतर्कता : आपली संयुक्त जबाबदारी” या विषयावर ९ ऑक्टोबर २०२५ रोजी विशेष परिसंवादाचे आयोजन करण्यात आले. सदर उपक्रमात विविध शाखांतील अधिकारी आणि कर्मचारी मोठ्या संख्येने सहभागी झाले.
या चर्चासत्रात उपस्थितांना संबोधित करताना श्री. नीरज कुमार दोहरे, वरिष्ठ उपमहाव्यवस्थापक व मुख्य सतर्कता अधिकारी, मध्य रेल्वे यांनी सांगितले की, प्रत्येक कर्मचाऱ्याने वैयक्तिक आणि व्यावसायिक प्रामाणिकता जपणे ही काळाची गरज आहे. त्यांनी कर्मचाऱ्यांना रेल्वेतील आचारसंहिता, नियमावली आणि पारदर्शक कार्यपद्धती याविषयी सखोल माहिती दिली. त्यांनी स्पष्ट केले की सतर्कता ही केवळ दक्षता विभागाची जबाबदारी नसून संपूर्ण संस्थेची संयुक्त बांधिलकी असली पाहिजे.
उपमुख्य सतर्कता अधिकाऱ्यांनी भ्रष्टाचार विरोधी उपाययोजनांची माहिती देताना काही वास्तविक प्रकरणांचा संदर्भ देऊन त्यातून शिकण्यासह सजग राहण्याचे महत्त्व पटवून दिले. त्यांनी हेही स्पष्ट केले की कार्यसंस्कृतीत प्रामाणिकपणाचे मूल्य रुजवण्यासाठी अशा उपक्रमांची गरज अधिक तीव्रतेने भासत आहे.
या परिसंवादाच्या दरम्यान रेल्वे आचारसंहितेवर आधारित प्रश्नमंजुषा स्पर्धा घेण्यात आली. स्पर्धेत उत्तम कामगिरी करणाऱ्या अधिकारी-कर्मचाऱ्यांना गौरवण्यात आले. या स्पर्धेद्वारे केवळ माहिती नव्हे तर नैतिक जागरूकता आणि वैचारिक स्पष्टता या बाबी बळकट करण्यात आल्या.
परिसंवादास विभागीय रेल्वे व्यवस्थापक हिरेश मिना, अतिरिक्त विभागीय व्यवस्थापक श्री. तरुण कुमार (इन्फ्रा व प्रशासन), श्री. मंगिलाल एल. विश्नोई (संचालन व सुरक्षा), तसेच परळ, माटुंगा व भायखळा कार्यशाळेतील वरिष्ठ अधिकारी आणि विविध शाखांचे प्रतिनिधी उपस्थित होते. चर्चासत्राच्या शेवटी वरिष्ठ विभागीय कार्मिक अधिकारी श्री. मनीष सिंग यांनी आभारप्रद भाषण करत दक्षता विभागाच्या कार्याची प्रशंसा केली आणि प्रामाणिक व पारदर्शक प्रशासनासाठी सर्वांनी पुढाकार घ्यावा, असे आवाहन केले.
या परिसंवादाच्या माध्यमातून मध्य रेल्वेच्या मुंबई विभागाने भ्रष्टाचारमुक्त आणि जबाबदार प्रशासकीय व्यवस्थेच्या दिशेने आपली बांधिलकी पुन्हा एकदा अधोरेखित केली आहे. ‘सतर्कता : आपली संयुक्त जबाबदारी’ ही संकल्पना प्रत्यक्षात उतरवण्यासाठी अशा उपक्रमांचा प्रभावी उपयोग होत असल्याचे यावेळी स्पष्ट झाले.
