मुक्ताईनगर लाईव्ह ट्रेंडस न्यूज प्रतिनिधी । मुक्ताईनगर तालुक्यातील चारठाणा येथे विषारी औषध प्राशन करून आत्महत्या करण्याचा प्रयत्न करणाऱ्या शेतकऱ्याचा उपचारादरम्यान मृत्यू झाला. ही हृदयद्रावक घटना गुरूवारी २० मार्च रोजी घडली असून, जळगाव शहर पोलीस स्टेशनमध्ये अकस्मात मृत्यूची नोंद करण्यात आली आहे.
१६ मार्च रोजी घेतले विषारी औषध; परिवारावर दु:खाचा डोंगर
परमेश्वर मरू बाजरे (वय ४८) असे आत्महत्या केलेल्या शेतकऱ्याचे नाव असून, त्यांच्या पश्चात पत्नी, एक मुलगा आणि दोन मुली असा परिवार आहे. शेतीच्या उत्पन्नावर ते संपूर्ण कुटुंबाचा उदरनिर्वाह करत होते. १६ मार्च रोजी सकाळी परमेश्वर बाजरे यांनी आपल्या शेतात विष प्राशन केले. त्यांच्या कुटुंबीयांनी तातडीने त्यांना शासकीय वैद्यकीय महाविद्यालय व रुग्णालयात दाखल केले. चार दिवस उपचार सुरू असतानाही त्यांची प्रकृती सुधारली नाही आणि २० मार्च रोजी सकाळी १२ वाजता त्यांचा मृत्यू झाला.
गावावर शोककळा
परमेश्वर बाजरे यांच्या दुर्दैवी निधनाने कुटुंबीयांमध्ये हळहळ व्यक्त होत असून, चारठाणा गावात शोककळा पसरली आहे. त्यांच्या आत्महत्येचे नेमके कारण स्पष्ट झाले नसले तरी, आर्थिक अडचणी व शेतीतील संकटे यामुळे त्यांनी टोकाचे पाऊल उचलले असण्याची शक्यता आहे.
