मुंबई-वृत्तसेवा । Indian Premier League 2026 मधील 53व्या सामन्यात Chennai Super Kings आणि Lucknow Super Giants यांच्यात रंगलेल्या सामन्यात युवा फलंदाज Urvil Patel याने वादळी फलंदाजी करत क्रिकेटप्रेमींना अक्षरशः मंत्रमुग्ध केले. लखनौने दिलेल्या 203 धावांच्या आव्हानाचा पाठलाग करताना उर्विल पटेलने अवघ्या 13 चेंडूत अर्धशतक झळकावत आयपीएल इतिहासात स्वतःचं नाव सुवर्णाक्षरांनी कोरलं.
लखनौ सुपर जायंट्सने प्रथम फलंदाजी करत चेन्नईसमोर 203 धावांचे मोठे लक्ष्य ठेवले होते. या धावांचा पाठलाग करताना चेन्नई सुपर किंग्सची सुरुवात आक्रमक झाली. संघाच्या 45 धावा असताना Sanju Samson बाद झाला. त्यानंतर मैदानात उतरलेल्या उर्विल पटेलने येताच लखनौच्या गोलंदाजांवर हल्लाबोल चढवला. त्याने मैदानाच्या चारही बाजूंनी फटकेबाजी करत सामन्याचं चित्रच बदलून टाकलं.
दिग्वेश राठीने संजू सॅमसनला बाद केल्यानंतर उर्विल पटेल फलंदाजीसाठी आला. सुरुवातीला शांतपणे खेळणाऱ्या उर्विलने पाचव्या षटकात Avesh Khan याच्या गोलंदाजीवर आक्रमण सुरू केलं. षटकाच्या चौथ्या, पाचव्या आणि सहाव्या चेंडूवर सलग तीन षटकार ठोकत त्याने लखनौच्या गोलंदाजांची धुलाई केली. त्यानंतर सहाव्या षटकात दिग्वेश राठीच्या गोलंदाजीवर त्याने पुन्हा तुफानी फटकेबाजी केली. एका षटकात तीन षटकार आणि एक चौकार ठोकत त्याने प्रेक्षकांना अक्षरशः वेड लावलं.
उर्विल पटेलची फलंदाजी इतकी आक्रमक होती की त्याचा स्ट्राईक रेट तब्बल 384.62 इतका नोंदवला गेला. त्याने 13 चेंडूत 7 षटकार आणि 1 चौकारासह अर्धशतक पूर्ण करत आयपीएलमधील सर्वात वेगवान अर्धशतकांच्या यादीत स्थान मिळवलं. यासह त्याने Yashasvi Jaiswal याच्या 13 चेंडूत अर्धशतकाच्या विक्रमाशी बरोबरी केली. अर्धशतक पूर्ण केल्यानंतर उर्विलने खिशातून चिठ्ठी काढून खास अंदाजात जल्लोष साजरा केला, ज्याची सोशल मीडियावर जोरदार चर्चा सुरू झाली आहे.
दरम्यान, Ruturaj Gaikwad याच्यासोबत उर्विलने अवघ्या 15 चेंडूत अर्धशतकी भागीदारी पूर्ण केली. सातव्या षटकात Mohammed Shami याच्याविरुद्धही त्याने आक्रमक खेळी कायम ठेवली. शमीच्या गोलंदाजीवर षटकार खेचत त्याने आपले अर्धशतक पूर्ण केले आणि चेन्नईच्या विजयाच्या आशा अधिक बळकट केल्या.
उर्विल पटेलच्या या धडाकेबाज खेळीमुळे आयपीएल 2026 मध्ये नव्या स्टारचा उदय झाल्याची चर्चा रंगली आहे. त्याच्या विस्फोटक फलंदाजीने चेन्नई सुपर किंग्सला सामन्यात मजबूत स्थितीत आणले असून, क्रिकेट चाहत्यांना एक संस्मरणीय खेळी पाहायला मिळाली.
