पारोळा-लाईव्ह ट्रेंडस न्यूज प्रतिनिधी | शेतातील सागाची झाडे तोडण्यासाठी आठ हजार रूपयांची मागणी करणाऱ्या वन खात्याच्या दोन कर्मचाऱ्यांना लाचलुचपत प्रतिबंधक खात्याच्या पथकाने आज अटक केल्याने खळबळ उडाली आहे.
या संदर्भातील वृत्त असे की, पारोळा तालुक्यातील एक व्यक्ती शेतात लावलेल्या सागाची वृक्ष खरेदी करण्याचा व्यवसाय करतात. त्यांनी इंधवे शिवारातील एका शेतकऱ्यासोबत साठ हजार रूपयांचे सागवान लाकूड खरेदीसाठी व्यवहार केला होता. यासाठी वन खात्याकडून परवानगी मिळावी म्हणून त्यांनी रीतसर अर्ज केला होता. या प्रकरणात वनपाल दिलीप भाईदास पाटील आणि वनपाल वैशाली ज्ञानेश्वर गायकवाड या दोन कर्मचाऱ्यांनी तक्रारदाराकडे आठ हजार रूपयांची मागणी केली होती.
दरम्यान, संबंधीत व्यक्तीने या संदर्भात लाचलुचपत प्रतिबंधक खात्याकडे तक्रार अर्ज केला होता. यानुसार पथक तयार करण्यात आले. आणि या पथकाने आज आठ हजार रूपयांची लाच स्वीकारतांना वनपाल दिलीप भाईदास पाटील आणि वनपाल वैशाली ज्ञानेश्वर गायकवाड या दोन कर्मचाऱ्यांना रंगेहात अटक केली असून त्यांना ताब्यात घेण्यात आले आहे. यातील महिला वनपालास नोटीस देऊन सोडण्यात आले आहे. या प्रकरणी पारोळा पोलीस स्थानकात गुन्हा नोंदविण्याचे काम सुरू होत्ो.
सदरची कारवाई ही लाचलुचपत प्रतिबंधक खात्याचे डीवायएसपी योगेश ठाकूर यांच्या मार्गदर्शनाखाली सफौ सुरेश पाटील, मपोहेकॉ शैला धनगर, पोहेकॉ किशोर महाजन, पोकॉ राकेश दुसाने व पोकॉ अमोल सूर्यवंशी यांच्या पथकाने केली.
