जळगाव लाईव्ह ट्रेंडस न्यूज प्रतिनिधी । जळगाव शहरातील गोविंदा रिक्षा स्टॉपजवळ उभ्या असलेल्या एका महेंद्र पिकअप वाहनातून चार लाख दोन हजार रुपये किमतीच्या सिगारेटची चोरी करणाऱ्या आंतरराज्य टोळीचा जळगाव शहर पोलिसांनी यशस्वी पर्दाफाश केला आहे. या प्रकरणी पुणे येथून एका संशयिताला अटक करण्यात आली असून, त्याच्या कबुलीवरून आणखी दोन साथीदारांना ताब्यात घेण्यात आले आहे. पोलिसांनी चोरलेल्या सिगारेट विकून मिळालेले तीन लाख रुपये जप्त केले आहेत. अशी माहिती पोलीस अधिक्षक महेश्वर रेड्डी यांनी शुक्रवारी ४ जुलै रोजी दुपारी १ वाजता पत्रकार परिषदेत माहिती दिली आहे.
जळगाव शहरातील गोविंदा रिक्षा स्टॉप येथे चंद्रशेखर जवरीलाल राका वय ५० रा. नवीपेठ जळगाव यांच्या मालकीचे उभ्या असलेल्या पिकअप वाहनाचे कुलूप तोडून सिगारेट चोरी झाल्याची घटना घडली होती. या संदर्भात जळगाव शहर पोलीस ठाण्यात गुन्हा दाखल करण्यात आला होता. पोलिसांनी तातडीने तपास सुरू करत, घटनास्थळावरील सीसीटीव्ही फुटेज आणि तांत्रिक विश्लेषणाच्या आधारे तपासाची चक्रे फिरवली.
तपासात सागर राजू घोडके (वय २८, रा. चिंचवड, पुणे) याचा या चोरीत सहभाग असल्याचे समोर आले. पोलिसांनी त्याचा पाठलाग करत पुणे येथून त्याला अटक केली. चौकशीदरम्यान सागर घोडकेने ही चोरी अभिजीत उर्फ कुबड्या तुलसीदास विटकर (वय-२५), काशीद अलीमुद्दीन अन्सारी (वय-२२) आणि आकाश उर्फ बंटी भवारसिंग राजपूत (वय २३) (तिघेही रा. चिंचवड, पुणे) यांनी मिळून केल्याची कबुली दिली.
पोलिसांनी या चौघांपैकी तीन जणांना अटक केली असून, त्यांच्याकडून सिगारेट विक्रीतून मिळालेले तीन लाख रुपये जप्त केले आहेत. ही माहिती जिल्हा पोलीस अधीक्षक डॉ. महेश्वर रेड्डी यांनी शुक्रवारी ४ जुलै रोजी दुपारी एक वाजता आयोजित पत्रकार परिषदेत दिली.
