यावल – लाईव्ह ट्रेंडस न्यूज प्रतिनिधी | तालुक्यातील मनवेल येथे माथेफिरूने विळ्याने 50 खोडे कापून फेकल्याने परिसरातील शेतकऱ्यांमध्ये संतापाची लाट उसळली आहे.
तालुक्यातील दोन शेतकऱ्यांचे कुणीतरी अज्ञात माथेफिरूने थोरगव्हाण रोड लगत असलेल्या शेतातील शेतकऱ्यांच्या उभ्या केळीचे घड अज्ञात व्यक्तिने विळ्याच्या साह्याने ५० केळीच्या झाडे कापुन एक लाखाच्या जवळपास नुकसान केले आहे. मनवेल येथील महेंद्र हुकुमचंद पाटील यांची थोरगव्हाण रस्त्यावर गट. न. १०० व जयंत रमांकात पाटील यांच्या गट. न . १७० मध्ये दोन्ही शेतकऱ्यांनी जैन टिश्युचे रोप असलेली नवती केळी लागवड केली असून केळीचे निसवन झालेले ५० घड अज्ञात माथेफेरूने विळ्याने कापुन नुकसान केल्याने एकच खळबळ उडाली आहे.
हि घटना ३ एप्रिल रोजी दुपारच्या दरम्यान घडली असून सायंकाळी शेतमालक शेतात फेरफटका मारायला गेले असता आपल्या शेतातील केळीचे निसवन झालेले घड अर्धीमधुन कापुन पडलेले दिसून आले.
अज्ञात माथेफेरू विरुद्ध यावल पोलिस स्टेशनला तक्रार दाखल करण्यात येत असून सदर प्रकार गंभीर असल्याने शेतकऱ्यांचे नुकसान झाले असून त्या माथेफिरूचा पोलिसांनी शोध घ्यावा अशी मागणी शेतकरी वर्गातुन करण्यात येत आहे.
