मुंबई-लाईव्ह ट्रेंडस न्यूज वृत्तसेवा | ठाकरे गटाचे नेते चंद्रहार पाटील यांनी रविवारी ठाकरे गटाचे नेते संजय राऊत यांची भेट घेतली आहे. यावेळी त्यांनी आगामी विधानसभा निवडणुकीमध्ये शिवसेना ठाकरे गट सांगलीमधून दोन जागा लढवणार असल्याचे सांगितले आहे. गुरुपौर्णिमेच्या निमित्ताने त्यांनी राऊतांची भेट घेतली आहे. या भेटीनंतर त्यांनी प्रसार माध्यमांशी संवाद साधला आहे.
यावेळी बोलतांना चंद्रहार पाटील म्हणाले, कोल्हापूरात जाऊन माझ्या कुस्तीतील गुरूंची भेट घेणार आहे. राजकीय भाष्य करताना ते म्हणाले, कोणत्याही मैदानात गेलो तरी काम प्रामाणिकपणे काम केल्यास यश हे नक्कीच मिळते. सांगलीमधून शिवसेना ठाकरे गट दोन जागा लढवणार आहे. मिरज आणि आटपाडी या दोन जागा लढणार असल्याची माहिती चंद्रहार पाटील यांनी दिली आहे.
लोकसभा निवडणुकीमध्ये चंद्रहार पाटील यांनी सांगलीमधून ठाकरे गटाकडून निवडणूक लढवली होती. मात्र त्यांचा विशाल पाटलांसमोर दारूण पराभव झाला होता. संजय पाटील यांच्यासह तीन पाटलांच्या लढतीत ते तिसऱ्या क्रमांकावर राहिले होते. यानंतर आगामी विधानसभा निवडणुकीसाठी जर पक्षाने आदेश दिला तर नक्कीच विचार करेन, असेही चंद्रहार पाटील म्हणाले. तसेच यश, अपयश हे राजकारणात येतच राहणार आहे. मात्र गुरूंनी लढत राहण्याचा सल्ला दिला आहे असेही ते म्हणाले.
