यावल-लाईव्ह ट्रेंड्स न्यूज प्रतिनिधी । तालुक्यातील शैक्षणिक क्षेत्रात आपली वेगळी ओळख निर्माण केलेल्या किनगावजवळील डोणगाव रोडवरील इंग्लिश मीडियम निवासी पब्लिक स्कूलमध्ये वार्षिक बक्षीस वितरण समारंभ उत्साहात पार पडला. विद्यार्थ्यांच्या सर्वांगीण विकासाला प्रोत्साहन देणाऱ्या या कार्यक्रमात ज्युनिअर केजी ते इयत्ता दहावीपर्यंतच्या विद्यार्थ्यांना विविध स्पर्धांतील कामगिरीबद्दल गौरविण्यात आले.
कार्यक्रमाची सुरुवात सरस्वती मातेच्या प्रतिमेला पुष्पहार अर्पण करून व पूजनाने करण्यात आली. कार्यक्रमाच्या अध्यक्षस्थानी मुख्याध्यापक अशोक प्रतापसिंग पाटील होते, तर संस्थापक चेअरमन विजयकुमार देवचंद पाटील, सचिव मनीष विजयकुमार पाटील तसेच स्व. केतनदादा मल्टी पर्पज फाउंडेशनच्या संचालिका सौ. पूनम मनीष पाटील प्रमुख अतिथी म्हणून उपस्थित होते. त्यांच्या उपस्थितीत विद्यार्थ्यांमध्ये उत्साहाचे वातावरण निर्माण झाले.
वर्षभरात घेतलेल्या विविध परीक्षा, विद्यार्थी दिन, गणेशोत्सव, दुर्गोत्सव, चित्रकला स्पर्धा तसेच विविध क्रीडा स्पर्धांमध्ये उत्कृष्ट कामगिरी करणाऱ्या विद्यार्थ्यांची निवड परीक्षकांमार्फत करण्यात आली होती. या सर्व स्पर्धांतील गुणवंत विद्यार्थ्यांना सुवर्ण व रौप्य पदके तसेच प्रमाणपत्र देऊन सन्मानित करण्यात आले. विद्यार्थ्यांच्या वर्षभरातील मेहनतीचा गौरव म्हणून हा सोहळा पार पडला.
यावेळी मुख्याध्यापक अशोक पाटील यांनी विद्यार्थ्यांना मार्गदर्शन करताना सांगितले की, आयुष्यात केवळ जिंकणे महत्त्वाचे नसून प्रामाणिकपणे प्रयत्न करणे अधिक आवश्यक आहे. खेळ किंवा कोणतीही स्पर्धा असो, त्यात सहभाग आणि प्रामाणिकता हीच खरी यशाची गुरुकिल्ली आहे. तसेच सौ. पूनम मनीष पाटील यांनी विद्यार्थ्यांना संबोधित करताना टीमवर्कचे महत्त्व अधोरेखित केले. कोणतेही कार्य एकट्याने न करता समूहाने केल्यास सुरक्षितता, सहकार्य आणि यश या सर्व गोष्टी अधिक प्रभावीपणे साध्य होतात, असे त्यांनी स्पष्ट केले.
कार्यक्रमाचे सूत्रसंचालन गोपाल चित्ते व ज्ञानेश्वर धनगर यांनी केले, तर आभार प्रदर्शन प्रतिभा धनगर यांनी मानले. कार्यक्रमाच्या यशस्वी आयोजनासाठी शाळेतील सर्व शिक्षक व शिक्षकेतर कर्मचाऱ्यांनी परिश्रम घेतले.
