रेड क्रॉस भवन येथे दि. १३ जुलै २०२६ रोजी पार पडलेल्या या कार्यशाळेला विशेष मुलांच्या पालकांनी उत्स्फूर्त प्रतिसाद दिला. विशेष मुलांचे संगोपन करताना पालकांना भावनिक, मानसिक, शारीरिक आणि सामाजिक पातळीवर अनेक आव्हानांना सामोरे जावे लागते. मुलांचे उपचार, शिक्षण, वर्तनातील बदल, भविष्यासंबंधीची चिंता आणि दैनंदिन जबाबदाऱ्यांमुळे पालकांवर मोठा मानसिक ताण निर्माण होत असल्याने या विषयावर मार्गदर्शनाची गरज लक्षात घेऊन कार्यशाळेचे आयोजन करण्यात आले होते. या कार्यशाळेत प्रसिद्ध मानसोपचार तज्ज्ञ धनंजय जकातदार यांनी पालकांना तणावाचे प्रभावी व्यवस्थापन कसे करावे, सकारात्मक विचारसरणी कशी विकसित करावी आणि भावनिक संतुलन कसे राखावे याबाबत सखोल मार्गदर्शन केले. त्यांनी मानसिक आरोग्य चांगले राखण्यासाठी योग, प्राणायाम आणि दैनंदिन जीवनात सहज करता येणाऱ्या विविध श्वसन तंत्रांचे महत्त्वही समजावून सांगितले. विशेष मुलांचे संगोपन करताना संयम, आत्मविश्वास आणि सकारात्मक दृष्टिकोन या तीन गोष्टी अत्यंत महत्त्वाच्या असल्याचे त्यांनी अधोरेखित केले. पालकांनी स्वतःचे मानसिक आणि शारीरिक आरोग्य जपल्यास त्याचा सकारात्मक परिणाम मुलांच्या विकासावर होतो. त्यामुळे स्वतःसाठी वेळ काढणे, ताण कमी करण्यासाठी नियमित व्यायाम, ध्यान आणि संवादाचे महत्त्व त्यांनी उदाहरणांसह स्पष्ट केले.
कार्यशाळेदरम्यान पालकांनी आपल्या अनुभवांची देवाणघेवाण केली तसेच विविध समस्यांवर तज्ज्ञांकडून मार्गदर्शन घेतले. ग्रुप थेरपीच्या माध्यमातून एकमेकांच्या अनुभवांतून शिकण्याची आणि भावनिक आधार मिळविण्याची संधीही पालकांना उपलब्ध झाली. त्यामुळे पालकांचा आत्मविश्वास वाढण्यास आणि विशेष मुलांचे संगोपन अधिक सकारात्मक पद्धतीने करण्यास मदत होणार असल्याचा विश्वास उपस्थितांनी व्यक्त केला. इंडियन रेडक्रॉस सोसायटी, जिल्हा शाखा जळगाव आणि जिल्हा दिव्यांग पुनर्वसन केंद्राच्या या उपक्रमाचे पालकांनी स्वागत केले. विशेष मुलांच्या कुटुंबांना मानसिक बळ देण्यासाठी अशा प्रकारच्या कार्यशाळा सातत्याने आयोजित करण्याची गरज असल्याचे मतही अनेक पालकांनी व्यक्त केले.
