पिचर्डे, ता. भडगाव-लाईव्ह ट्रेंड्स न्यूज प्रतिनिधी । दिवाळीचा सण सर्वत्र आनंदात आणि उत्साहात साजरा होत असताना केळी शास्त्रज्ञ मंचाच्या पदाधिकाऱ्यांनी मात्र शेतकऱ्यांच्या बांधावर पोहोचून त्यांच्यासोबत दिवाळीचा आनंद साजरा केला. भडगाव तालुक्यातील पिचर्डे परिसरात केळी उत्पादक शेतकऱ्यांच्या शेतांना प्रत्यक्ष भेट देत केळी पिकाची पाहणी करण्यात आली. यावेळी पिकाचे योग्य व्यवस्थापन, आधुनिक शेती तंत्रज्ञान, रोग-किडींचे नियंत्रण आणि दर्जेदार उत्पादन वाढविण्याबाबत शेतकऱ्यांना मोलाचे मार्गदर्शन करण्यात आले.
या उपक्रमात केळी शास्त्रज्ञ मंचाचे जिल्हा उपाध्यक्ष विनोद बोरसे यांच्यासह मंचाचे जिल्हा पदाधिकारी सहभागी झाले होते. त्यांनी शेतकऱ्यांच्या शेतात जाऊन केळी पिकाची सद्यस्थिती जाणून घेतली. पिकाची वाढ, खतांचा योग्य वापर, पाणी व्यवस्थापन आणि रोग-किडींचा प्रादुर्भाव रोखण्यासाठी घ्यावयाची काळजी यासह विविध कृषीविषयक बाबींवर सविस्तर मार्गदर्शन केले. आधुनिक तंत्रज्ञानाचा योग्य वापर करून उत्पादनाचा दर्जा आणि उत्पादकता कशी वाढवता येईल, याबाबतही त्यांनी शेतकऱ्यांशी चर्चा केली.
भडगाव तालुक्यात केळी हे शेतकऱ्यांच्या आर्थिक उत्पन्नाचे महत्त्वाचे पीक बनले आहे. मात्र, बदलते हवामान, पाण्याची उपलब्धता, वाढता उत्पादन खर्च आणि विविध रोग-किडींचा प्रादुर्भाव यामुळे केळी उत्पादक शेतकऱ्यांसमोर अनेक आव्हाने निर्माण होत आहेत. अशा परिस्थितीत कृषी क्षेत्रातील तज्ज्ञांनी थेट शेताच्या बांधावर जाऊन पिकांची पाहणी करणे आणि शेतकऱ्यांच्या अडचणी समजून घेऊन त्यावर उपाय सुचविणे महत्त्वाचे ठरत आहे.
केळी शास्त्रज्ञ मंचाच्या पदाधिकाऱ्यांनी प्रत्यक्ष शेतात जाऊन मार्गदर्शन केल्यामुळे शेतकऱ्यांना आपल्या पिकासंदर्भातील समस्यांवर तज्ज्ञांशी थेट चर्चा करण्याची संधी मिळाली. केवळ कार्यालयीन मार्गदर्शन न करता प्रत्यक्ष शेतातील परिस्थितीचा अभ्यास करून सल्ला देण्याच्या या उपक्रमाचे परिसरातील शेतकऱ्यांकडून स्वागत करण्यात आले. यावेळी पिचर्डे गावातील प्रगतिशील शेतकरी राजेंद्र पाटील, गोरख महाजन, योगेश महाजन, हेमराज पाटील, दीपक बोरसे, सोपान पाटील सर, महादू महाजन, मयूर पाटील यांच्यासह परिसरातील अनेक केळी उत्पादक शेतकरी उपस्थित होते.
