मिळालेल्या प्राथमिक माहितीनुसार, सरफराज सय्यद हा मुक्ताईनगर शहरातील काजीपुरा परिसरातील रहिवासी आहे. तो डंपरवर चालक म्हणून काम करून कुटुंबाचा उदरनिर्वाह करत होता. कामाच्या निमित्ताने तो वरणगाव परिसरात आला होता. याचदरम्यान त्याच्यावर गोळीबार झाल्याची घटना घडली. अचानक झालेल्या या प्रकारामुळे परिसरात एकच धावपळ उडाली. गोळीबारात गंभीर जखमी झालेल्या सरफराजला तातडीने उपचारासाठी हलविण्यात आल्याची माहिती आहे.
सरफराजवर गोळीबार नेमका कोणी आणि कोणत्या कारणातून केला, याबाबत अद्याप ठोस माहिती समोर आलेली नाही. वैयक्तिक वाद, पूर्ववैमनस्य की अन्य काही कारणातून हा हल्ला करण्यात आला, याबाबत विविध तर्कवितर्क लावले जात आहेत. मात्र, पोलीस तपास पूर्ण झाल्यानंतरच या घटनेमागील नेमके कारण स्पष्ट होणार आहे.
दरम्यान, मुक्ताईनगरमधील तरुणावर वरणगाव येथे गोळीबार झाल्याची बातमी समजताच मुक्ताईनगर परिसरातही चिंतेचे वातावरण निर्माण झाले आहे. एका तरुणावर अशा प्रकारे गोळीबार झाल्याने परिसरातील नागरिकांमध्ये भीती व्यक्त केली जात आहे. पोलिसांनी या घटनेचा गांभीर्याने तपास करून फरार संशयिताला तातडीने अटक करावी, अशी अपेक्षा व्यक्त होत आहे.
वरणगाव येथील या गोळीबार प्रकरणामुळे परिसरात खळबळ उडाली असून, सरफराजची प्रकृती, गोळीबारामागील कारण आणि फरार संशयिताची माहिती पोलीस तपासातून समोर येणार आहे.
