दिल्ली-लाईव्ह ट्रेंडस न्यूज वृत्तसेवा | दिल्लीतील १९८४ शीख विरोधी दंगली प्रकरणात काँग्रेसचे माजी खासदार सज्जन कुमार यांना मंगळवारी जन्मठेपेची शिक्षा सुनावण्यात आली आहे. राऊस अव्हेन्यू न्यायालयाच्या विशेष न्यायाधीश कावेरी बावेजा यांनी दुपारी २ नंतर हा निकाल जाहीर केला. यापूर्वी २१ फेब्रुवारी रोजी न्यायालयाने शिक्षेवरील निर्णय राखून ठेवला होता.
या प्रकरणात पीडितेच्या बाजूने सज्जन कुमारला फाशीची शिक्षा देण्याची मागणी करण्यात आली होती. १२ फेब्रुवारी रोजी न्यायालयाने त्यांना दोषी ठरवले होते. हे प्रकरण दंगलीच्या काळात सरस्वती विहार येथे जसवंत सिंग आणि त्यांचा मुलगा तरुणदीप सिंग यांच्या हत्येशी संबंधित आहे. त्या वेळी सज्जन कुमार हे बाह्य दिल्ली लोकसभा मतदारसंघातून काँग्रेसचे खासदार होते. ते सध्या दंगलीच्या दुसऱ्या एका प्रकरणात तिहार तुरुंगात असून जन्मठेपेची शिक्षा भोगत आहेत.
