जळगाव लाईव्ह ट्रेंडस न्यूज प्रतिनिधी । जळगाव शहरातील सदोबा नगरात मातृभूमी चौकात पायी जात असलेल्या महिलेच्या गळ्यातून ३२ हजार रूपये किंमतीची सोन्याचे मंगळसुत्र अज्ञात चोरट्यांनी चोरून नेल्याची घटना शनिवारी २२ फेब्रुवारी रोजी रात्री ९ वाजता घडली आहे. याप्रकरणी सोमवारी २४ फेब्रुवारी रोजी सायंकाळी ६ वाजता एमआयडीसी पोलीस ठाण्यात गुन्हा दाखल करण्यात आला आहे.
शहरातील जूना नशिराबाद रोडवरील सदोबा नगरात शितल दर्शन पाटील (वय ३२) या वास्तव्यास आहे. शनिवारी २२ रोजी रात्री त्या जेवण झाल्यानंतर घराजवळील हिरा पाईप रोड परिसरात शतपावली करण्यासाठी गेल्या होत्या. यावेळी रस्त्याने चालत असतांना रात्री ९ वाजेच्या सुमारास दुचाकीवरुन आलेल्या अनोळखी इसमाने त्यांच्या गळ्यातून ८ ग्रॅम वजनाची ६० हजार रुपये किंमतीचे मंगळसूत्र चोरुन नेले. चोरट्याने त्यांच्या गळ्यातील मंगळसूत्र ओढल्यानंतर सुमारे दीड ग्रॅम वजनाचे मंगळसूत्रातील वाटी ही घटनास्थळी मिळून आली. याप्रकरणी सोमवारी २४ फेब्रुवारी रोजी सायंकाळी ६ वाजता शितल पाटील यांनी एमआयडीसी पोलिसात तक्रार दिली. त्यानुसार अज्ञात चोरट्याविरुद्ध गुन्हा दाखल करण्यात आला आहे. तपास उपनिरीक्षक मोहन पाटील करीत आहे.
