बुलडाणा-लाईव्ह ट्रेंडस न्यूज प्रतिनिधी । वीज ही नागरिकांची मुलभूत गरज असून, परिमंडळातील पायाभूत विकासाला गती देऊन ग्राहकाभिमुख सेवा देण्यावर भर दिला जाईल, असे प्रतिपादन महावितरण अकोला परिमंडळाचे नव्याने रुजू झालेले मुख्य अभियंता राजेश नाईक यांनी केले. महावितरणच्या मुख्य अभियंता सुहास रंगारी यांची गोंदिया येथे बदली झाल्याने हे पद रिक्त झाले होते.
२८ वर्षांचा प्रदीर्घ अनुभव
राजेश नाईक यांनी आपली कारकीर्द अकोला परिमंडळात कनिष्ठ अभियंता म्हणून सुरू केली होती. तत्कालीन एमएसईबी बोर्ड ते आजच्या महावितरण या प्रवासात त्यांनी २८ वर्षे महत्वपूर्ण पदांवर कार्य केले आहे. कनिष्ठ अभियंता, उपकार्यकारी अभियंता, कार्यकारी अभियंता आणि अधीक्षक अभियंता अशा विविध जबाबदाऱ्यांमध्ये त्यांनी उल्लेखनीय योगदान दिले आहे.
ग्रामीण व शहरी भागातील प्रशासनाचा दांडगा अनुभव
राजेश नाईक यांनी यापूर्वी अधीक्षक अभियंता वाशी, अधीक्षक अभियंता भंडारा आणि अधीक्षक अभियंता नागपूर ग्रामीण अशा ग्रामीण व शहरी भागात कार्यभार सांभाळला आहे. त्यामुळे त्यांच्या अनुभवी नेतृत्वाचा उपयोग महावितरणच्या सेवा सुधारण्यासाठी आणि ग्राहकांचे प्रश्न सोडवण्यासाठी होणार आहे.
प्रशासनाचा कारभार आणि पुढील दिशा
मुख्य अभियंता पदाचा पदभार स्वीकारल्यानंतर राजेश नाईक यांनी परिमंडळातील विविध विभागांशी बैठका घेतल्या आणि त्याठिकाणी योजनेच्या अंमलबजावणीचा आढावा घेतला.
ग्राहकाभिमुख सेवा देण्यासाठी पुढील काही प्रमुख गोष्टींवर भर दिला जाणार आहे: ग्राहकांना अखंडित वीजपुरवठा मिळावा, वीज वितरण प्रणालीतील सुधारणा व पायाभूत विकासाला गती, वीज ग्राहकांच्या तक्रारी तत्काळ सोडवण्याचे आश्वासन, महावितरणच्या विविध योजनांचा लाभ अधिकाधिक ग्राहकांपर्यंत पोहोचवणे, वीजबिल वसुली शंभर टक्के करण्यावर भर
कर्तव्य कठोर आणि कर्मचारी हित जपणारे अधिकारी
राजेश नाईक अभ्यासू आणि प्रभावी प्रशासक म्हणून ओळखले जातात. महावितरणच्या हिताला प्राधान्य देऊन कर्मचार्‍यांसोबत सलोख्याने काम करणारे तसेच कठोर निर्णय घेण्यास सक्षम अधिकारी म्हणून त्यांची ओळख आहे.
