मुंबई-लाईव्ह ट्रेंड्स न्यूज वृत्तसेवा। मुंबईच्या राजकारणात पुन्हा एकदा मोठी हालचाल दिसून येत आहे. महाराष्ट्र नवनिर्माण सेनेचे अध्यक्ष राज ठाकरे हे आज पुन्हा एकदा मातोश्रीवर पोहोचले. काही दिवसांपूर्वीच उद्धव ठाकरे यांच्या वाढदिवसानिमित्त त्यांनी मातोश्रीवर भेट दिली होती. ही दोन आठवड्यांत दुसरी भेट असल्यामुळे राजकीय वर्तुळात चर्चेला जोर चढला आहे.
आज सकाळपासूनच चर्चांना सुरुवात झाली, जेव्हा राज ठाकरे हे संजय राऊत यांच्या नातवाच्या नामकरण समारंभात सहभागी झाले. या कार्यक्रमात उद्धव ठाकरे, राज ठाकरे आणि संजय राऊत हे तिघेही उपस्थित होते. कार्यक्रमानंतर राज ठाकरे थेट मातोश्रीवर रवाना झाले, ही गोष्ट लक्षवेधी ठरली आहे. याआधी केवळ औपचारिक शुभेच्छांची भेट मानली जात होती, पण आता वारंवार होणाऱ्या या भेटींमुळे युतीच्या शक्यता अधिक बळकट होताना दिसत आहेत.
गेल्या काही महिन्यांत ठाकरे बंधूंमधील जवळीक पुन्हा दिसून आली आहे. त्रिभाषा धोरणाविरोधातील विजयी मेळाव्यानंतर दोघे अनेक वर्षांनी एकाच व्यासपीठावर आले. त्यानंतर राज ठाकरे यांनी उद्धव ठाकरेंच्या वाढदिवसानिमित्त मातोश्रीवर जाऊन भेट घेतली. प्रत्युत्तरादाखल उद्धव ठाकरे देखील ‘शिवतीर्थ’ येथे पोहोचले. या दोन्ही भेटींनंतर राजकीय चर्चांना उधाण आलं होतं की आगामी महापालिका निवडणुकीच्या पार्श्वभूमीवर मनसे आणि शिवसेना (ठाकरे गट) एकत्र येणार आहेत का?
मिळालेल्या माहितीनुसार, अशा बैठकीत उद्धव ठाकरे, राज ठाकरे, संजय राऊत आणि अनिल परब यांच्यात महत्त्वपूर्ण चर्चा झाली होती. महापालिका निवडणुका डोळ्यासमोर ठेवून रणनीती ठरवली गेल्याची शक्यता वर्तवली जात आहे. आता पुन्हा राज ठाकरे यांच्या मातोश्रीवरील उपस्थितीने या चर्चेला आणखी गती दिली आहे.
या पार्श्वभूमीवर राज ठाकरे आणि उद्धव ठाकरे पुन्हा एकत्र येणार का, असा प्रश्न आता राजकीय वर्तुळात वारंवार विचारला जात आहे. दोघांचेही विचार काही मुद्द्यांवर समान आहेत, तर काही मुद्द्यांवर भिन्न. मात्र सध्याच्या राजकीय समीकरणांमध्ये दोघांचं एकत्र येणं म्हणजे भाजप विरोधकांसाठी नवी ताकद उभी राहण्यासारखं ठरेल, असा राजकीय विश्लेषकांचा कयास आहे.
या घडामोडींमुळे शिवसेना ठाकरे गट आणि मनसे युतीच्या शक्यतेकडे राज्याचे राजकारण डोळे लावून बसले आहे. पुढील काही दिवसांत या चर्चेला दुजोरा मिळतो की फक्त औपचारिक भेटीच राहतात, हे पाहणं महत्त्वाचं ठरेल.
