जळगाव-लाईव्ह ट्रेंड्स न्यूज प्रतिनिधी । नाशिक जिल्ह्यातील सिन्नर तालुक्यातील दोडी बुद्रुक येथे कुंभार समाजातील महिलेच्या कथित बलात्कार व निर्घृण हत्या प्रकरणामुळे संतापाचे वातावरण निर्माण झाले आहे. या घटनेतील संशयित आरोपींना तातडीने अटक करून कठोरात कठोर कारवाई करावी, तसेच पीडित कुटुंबाला पोलीस संरक्षण व आर्थिक मदत द्यावी, अशी मागणी कुंभार समाज सामाजिक संस्था महाराष्ट्र प्रदेश*यांच्या वतीने मुख्यमंत्री देवेंद्र फडणवीस यांच्याकडे निवेदनाद्वारे करण्यात आली आहे.
संस्थेचे जळगाव जिल्हाध्यक्ष चंद्रशेखर कडू कापडे यांच्या नेतृत्वाखाली हे निवेदन जिल्हाधिकाऱ्यांमार्फत मुख्यमंत्र्यांना देण्यात आले आहे. निवेदनात नमूद केल्यानुसार,५ ऑगस्ट २०२६ रोजी दोडी बुद्रुक, ता. सिन्नर, जि. नाशिक येथे कुंभार समाजातील संगीता मधुकर जाधव यांची निर्घृण हत्या झाल्याचा आरोप करण्यात आला आहे. या घटनेचा निषेध करत संबंधितांवर कठोर कारवाईची मागणी करण्यात आली आहे.
निवेदनानुसार, घटनेच्या काही दिवसांपूर्वी संगीता जाधव यांच्यावर कथित बलात्कार झाल्याचा आरोप करण्यात आला होता. याबाबत पीडित कुटुंबीयांनी गावातील संबंधित संशयित आरोपींविरोधात पोलिसांत तक्रार दाखल केल्याचे निवेदनात म्हटले आहे. त्यानंतर पीडित कुटुंबातील सदस्यांना कथितरीत्या धमक्या देण्यात आल्याचा आरोपही करण्यात आला आहे.
निवेदनात पुढे असा आरोप करण्यात आला आहे की, प्रकरण मागे घेण्यासाठी पीडित कुटुंबीयांना पैशांचे आमिष दाखविण्यात आले तसेच केस मागे न घेतल्यास गंभीर परिणाम भोगावे लागतील, अशा धमक्या देण्यात आल्या. मात्र, संबंधित महिला दबावाला बळी न पडल्याने तिच्यावर हल्ला करण्यात आल्याचा दावा संस्थेने निवेदनातून केला आहे. या सर्व आरोपांची पोलिसांकडून सखोल चौकशी होणे आवश्यक असल्याची भूमिका संस्थेने घेतली आहे.
सदर महिलेचे अपहरण करून हातपाय बांधण्यात आले आणि गळ्याला फास लावून विहिरीत टाकून तिची हत्या करण्यात आल्याचा गंभीर आरोप निवेदनात करण्यात आला आहे. या घटनेमुळे परिसरात खळबळ उडाली असून, प्रकरणातील प्रत्येक आरोपीचा शोध घेऊन त्यांच्यावर कायद्यानुसार कठोर कारवाई करावी, अशी मागणी करण्यात आली आहे.
या घटनेमुळे पुरोगामी महाराष्ट्राच्या प्रतिमेला धक्का बसल्याची भावना कुंभार समाजाच्या प्रतिनिधींनी व्यक्त केली आहे. संत गोरोबा काका यांच्या विचारांनी प्रेरित असलेल्या शांतताप्रिय कुंभार समाजाच्या संयमाची परीक्षा घेऊ नये, असा इशाराही निवेदनातून देण्यात आला आहे. ही केवळ एका महिलेची हत्या नसून संपूर्ण समाजाच्या अस्मितेवर हल्ला असल्याची भावना समाजाच्या प्रतिनिधींनी व्यक्त केली आहे.
प्रकरणातील संशयित आरोपींना तातडीने अटक करण्यात आली नाही, तर महाराष्ट्रभर कुंभार समाजाच्या वतीने तीव्र आंदोलन छेडण्यात येईल, असा इशारा निवेदनातून देण्यात आला आहे. त्यामुळे प्रशासनाने या प्रकरणाकडे गांभीर्याने पाहून तपासाला गती द्यावी आणि दोषींवर कायदेशीर कारवाई करावी, अशी मागणी करण्यात आली आहे.
निवेदनात संबंधित प्रकरणात निष्णात सरकारी वकील नियुक्त करून खटला फास्टट्रॅक न्यायालयात चालवावा आणि दोषी आढळणाऱ्यांना कायद्यानुसार कठोरातील कठोर शिक्षा द्यावी, अशी मागणी करण्यात आली आहे. तसेच पीडित कुटुंबाला तातडीने पोलीस संरक्षण आणि आर्थिक मदत उपलब्ध करून देण्याची मागणीही करण्यात आली आहे.
कुंभार समाज सामाजिक संस्था महाराष्ट्र प्रदेशच्या पदाधिकाऱ्यांनी या प्रकरणी सरकारने तातडीने हस्तक्षेप करून पीडित कुटुंबाला न्याय मिळवून द्यावा, अशी अपेक्षा व्यक्त केली आहे. निवेदनावर जळगाव जिल्हाध्यक्ष चंद्रशेखर कडू कापडे यांच्यासह सखाराम मोरे, सुभाष पंडीत, विनोद पंडीत, विलास कुंभार, अशोक पंडीत, संजय कुमार, रविंद्र मोरे, देवाभाऊ कुंभार, मुन्नर कुंभार आणि इतर पदाधिकाऱ्यांच्या स्वाक्षऱ्या आहेत.
