जळगाव-लाईव्ह ट्रेंडस न्यूज प्रतिनिधी | शिवसेना (उद्धव बाळासाहेब ठाकरे) पक्षाच्या युवासेना तर्फे शुक्रवार, दिनांक 14 मार्च 2025 रोजी जळगाव शहरातील खान्देश सेंट्रल मॉल येथे धुलिवंदनानिमित्त रंग बरसे कार्यक्रम आयोजित करण्यात आला आहे. हा कार्यक्रम सर्व जळगावकर नागरिकांसाठी खुला राहणार असून, सर्वांना विनामूल्य प्रवेश देण्यात येणार आहे.
या विशेष कार्यक्रमासाठी पुण्याहून 700 किलो पर्यावरणपूरक नैसर्गिक रंग मागविण्यात आला आहे. त्याचबरोबर मुंबईहून 70 सिलेंडर विविध रंग, कलर स्प्रे, सीओटू कनफत्ती ब्लास्ट मशीन आणि पेपर ब्लास्ट यांचीही व्यवस्था करण्यात आली आहे. या सोहळ्यात पारंपरिक वाद्य, फ्लायिंग डॉल्बी साऊंड सिस्टिमवर होळीची गाणी यांचा विशेष समावेश असेल, ज्यामुळे जळगावकर नागरिकांना एक अद्वितीय अनुभव मिळणार आहे.
कार्यक्रमात महिलांसाठी आणि पुरुषांसाठी स्वतंत्र व्यवस्था करण्यात आली आहे. तसेच सहकुटुंब सहभागी होणाऱ्या नागरिकांसाठी वेगळी विशेष व्यवस्था करण्यात आली आहे, जेणेकरून सर्वजण हा रंगांचा उत्सव आनंदाने साजरा करू शकतील. युवासेना तर्फे प्रीतम शिंदे, अजय खैरनार आणि संदीप सूर्यवंशी यांनी सर्व जळगावकर नागरिकांना या रंग बरसे कार्यक्रमात सहभागी होऊन आनंद द्विगुणित करण्याचे आवाहन केले आहे.
