यावल-लाईव्ह ट्रेंड्स न्यूज प्रतिनिधी । यावल नगरपालिकेची सर्वसाधारण सभा नगराध्यक्ष छाया पाटील यांच्या अध्यक्षतेखाली पार पडली असून, या सभेत शहराच्या विकासासाठी २७ विविध कामांना मंजुरी देण्यात आली. मात्र शालेय समिती निवडीच्या मुद्द्यावरून सभा चांगलीच गाजली विरोधी गटातील सदस्यांनी बहिष्कार टाकत वातावरण तापले.
सभेला मुख्याधिकारी निशिकांत गवई यांची प्रमुख उपस्थिती होती. शहरातील विविध विकासकामांचा प्रस्ताव या बैठकीत मांडण्यात आला आणि त्यास बहुमताने मंजुरी देण्यात आली. या विकासकामांमध्ये पायाभूत सुविधा, नागरी सेवा सुधारणा आणि इतर महत्त्वाच्या प्रकल्पांचा समावेश असल्याचे सांगण्यात आले. नगरपालिकेच्या माध्यमातून शहराच्या सर्वांगीण विकासासाठी ही कामे महत्त्वाची ठरणार असल्याचे प्रशासनाकडून स्पष्ट करण्यात आले.
मात्र सभेदरम्यान शालेय समितीच्या निवडीचा विषय समोर येताच वातावरणात तणाव निर्माण झाला. समिती सदस्यांची निवड मान्य नसल्याचे सांगत विरोधी भारतीय जनता पक्ष आणि राष्ट्रवादी काँग्रेसच्या अजित पवार गटाच्या महायुती सदस्यांनी तीव्र आक्षेप घेतला. या मुद्द्यावरून वाद वाढत गेला आणि अखेरीस संबंधित सदस्यांनी सभेचा बहिष्कार जाहीर केला.
बहिष्कार टाकताना सदस्यांनी या प्रकरणात अन्याय झाल्याचा आरोप करत आपली बाजू मांडली. शालेय समितीच्या निवड प्रक्रियेत पारदर्शकता नसल्याचा दावा त्यांनी केला असून, या निर्णयाविरोधात जिल्हाधिकारी यांच्याकडे दाद मागणार असल्याचेही स्पष्ट केले. या घडामोडींमुळे सभेचे वातावरण काही काळ तणावपूर्ण झाले होते. सभेत विकासकामांना मंजुरी मिळाल्याने शहराच्या प्रगतीस चालना मिळणार असली, तरी शालेय समितीच्या वादामुळे राजकीय वातावरण ढवळून निघाले आहे. प्रशासन आणि निवडून आलेल्या प्रतिनिधींमध्ये समन्वयाची गरज अधोरेखित होत आहे.
