भडगाव-लाईव्ह ट्रेंड्स न्यूज प्रतिनिधी । भडगाव तालुक्यातील शेतकरी सहकारी संघात ऑनलाइन नोंदणी प्रक्रियेला अखेर सुरळीत सुरुवात झाली असून, प्रारंभीच्या गोंधळानंतर शेतकऱ्यांना दिलासा मिळाला आहे. टोकनसाठी अनेक दिवसांपासून प्रतीक्षा करणाऱ्या शेतकरी वर्गात समाधानाचे वातावरण दिसून येत आहे.
भडगाव शेतकरी सहकारी संघात आजपासून ऑनलाइन नोंदणी प्रक्रिया सुरू करण्यात आली. यापूर्वी टोकन मिळवण्यासाठी शेतकऱ्यांना मोठ्या प्रमाणावर गर्दी करावी लागत होती. पहिल्याच दिवशी मोठ्या संख्येने शेतकरी एकत्र आल्यामुळे गोंधळाचे वातावरण निर्माण झाले होते. कोणतीही पूर्वसूचना नसताना झालेल्या या गर्दीमुळे प्रशासनालाही अडचणींचा सामना करावा लागला. परिस्थिती नियंत्रणात आणण्यासाठी शेतकरी वर्गाला पुढील आदेश येईपर्यंत थांबण्याचे आवाहन करण्यात आले होते.
यानंतर शेतकरी सहकारी संघाच्या संचालक मंडळाची तातडीची बैठक घेण्यात आली. या बैठकीत ऑनलाइन टोकन प्रणाली सुरू करण्याचा महत्त्वपूर्ण निर्णय घेण्यात आला. त्यानुसार १३ एप्रिल रोजी दुपारी १ वाजल्यापासून ऑनलाइन टोकन नोंदणी सुरू करण्यात आली. या नव्या प्रणालीला शेतकऱ्यांचा उत्स्फूर्त प्रतिसाद मिळाला असून, अनेकांनी मोठ्या प्रमाणावर नोंदणी केली.
दरम्यान, १५ एप्रिल रोजी ऑनलाइन टोकन मिळालेल्या १ ते १०० क्रमांकाच्या शेतकऱ्यांची प्रत्यक्ष नोंदणी शेतकरी संघाच्या कार्यालयात सुरू करण्यात आली. या प्रक्रियेदरम्यान कोणताही गोंधळ होऊ नये यासाठी नियोजनबद्ध पद्धतीने काम करण्यात आले. शेतकरी संघाचे व्यवस्थापक सुरेश पाटील, लिपिक दिलीप नरवाडे, तसेच साहेबराव पाटील, अनिल पाटील आणि विशाल भोई यांनी उपस्थित राहून नोंदणी प्रक्रिया पार पाडली.
ऑनलाइन टोकन प्रणालीमुळे शेतकऱ्यांचा वेळ वाचत असून, अनावश्यक गर्दी टाळण्यात मदत होत आहे. भविष्यातही ही प्रक्रिया अधिक प्रभावीपणे राबविण्यासाठी संघ प्रयत्नशील असल्याचे सांगण्यात आले आहे.
