यावल – – लाईव्ह ट्रेंडस न्यूज प्रतिनिधी । तालुक्यातील किनगाव येथील तरुणाकडून पैसे घेत लग्न करून फसवणूक करणार्‍या फरार असलेल्या नववधूला यावल पोलिसांनी अटक केली आहे. शनिवारी ५ फेब्रुवारी रोजी दुपारी यावल न्यायालयात हजर केले असता मंगळवार ८ फेब्रुवारीपर्यंत पोलिस कोठडी सुनावण्यात आली आहे.
यावल तालुक्यातील किनगाव येथील रहिवाशी धनंजय हिरालाल सोनार या तरूणाचा यशवंत उर्फ दादू विजय पाटील रा. सांगली खुर्द यांची मानलेली बहीण सरिता प्रकाश कोळी रा. अंजाळे हिच्यासोबत विवाह निश्चित झाला होता. या विवाहासाठी सव्वा लाख रुपये द्यावे तसेच लग्नाचा खर्च मुलाने करावा असे ठरवण्यात आले होते. त्याप्रमाणे ८५ हजार रुपयांची रोकड देण्यात आली होती, उर्वरित रक्कम नंतर देणार होते. १४ डिसेंबर २०२१ रोजी देहू आळंदी पुणे येथील अलंकापुरी मंगल कार्यालय पुणे येथे लग्न देखील पार पडले. लग्नाच्या सात दिवसानंतर यशवंत उर्फ दादू विजय पाटील किनगाव येथे आला व नववधू सरिता कोळी हिला तिच्या आईच्या भेटीसाठी मी घेऊन जात आहे असे सांगून घेऊन गेला तर परत आलाच नाही. सर्वत्र शोधाशोध करून देखील नववधू आणि तिचा मानलेला भाऊ मिळून न आल्यामुळे आपली फसवणूक झाल्याची सोनार यांच्या लक्षात आले. सोनार यांनी यावल पोलीस ठाण्यात धाव घेवून तक्रार दिली. त्यांच्या तक्रारीवरून शुक्रवारी ४ फेब्रुवारी रोजी यावल पोलीसात दोघांवर गुन्हा दाखल करण्यात आला होता. संशयित आरोपी नववधू सरिता हिला पोलिसांनी अटक केली आहे. शनिवारी ५ फेब्रुवारी रोजी दुपारी न्यायालयात प्रथम वर्ग न्यायमुर्ती एन.एच. बनचरे यांच्यासमोर हजर केले असता तिला मंगळवार ८ फेब्रुवारीपर्यंत पोलिस कोठडी देण्यात आली आहे. पुढील तपास पोलिस निरीक्षक सुधीर पाटील यांच्या मार्गदर्शनाखाली पोलिस उपनिरीक्षक जितेंद्र खैरनार करीत आहे.
