नवलेवाडीत ईव्हीएमचा घोळ; कोणतंही बटण दाबलं तरी कमळाला मत

evm

सातारा प्रतिनिधी । कोरेगाव मतदारसंघातील नवलेवाडी गावातील मतदान केंद्रावरील ईव्हीएममध्ये घोळ असल्याचा धक्कादायक प्रकार समोर आला आहे. या केंद्रावरील ईव्हीएमवरील कोणतंही बटण दाबले तरी मत कमळ या चिन्हालाच जात असल्याचं समोर आले. ही बाब गावकऱ्यांच्या लक्षात आल्यानंतर त्यांनी मतदान केंद्रावरील अधिकाऱ्यांना सांगितले.

केंद्रावरील अधिकाऱ्यांनीही ही बाब मान्य केली आणि तातडीनं ईव्हीएम बदलण्यात आल्याचं सांगण्यात येत आहे. राज्यात विधानसभा निवडणुकीसह लोकसभेच्या सातारा मतदारसंघात पोटनिवडणुकीसाठीही मतदान झालं. सोमवारी सकाळी मतदानाला सुरुवात झाली. कोरेगाव मतदारसंघातील नवलेवाडी गावातील मतदान केंद्रातील ईव्हीएममध्ये घोळ झाल्याचं मतदारांच्या लक्षात आलं. मतदारांनी राष्ट्रवादी काँग्रेसच्या उमेदवाराला मतदान दिल्यानंतरही व्हीव्हीपॅटमध्ये कमळ चिन्ह असलेल्या भाजपच्या उमेदवाराला मत जात असल्याचं काही गावकऱ्यांच्या लक्षात आलं. सकाळी अकराच्या सुमारास ही बाब निदर्शनास आलं. तोपर्यंत दोनशेच्या जवळपास मतदान झालं होतं. मतदान केंद्रावरील अधिकाऱ्यांना याबाबत गावकऱ्यांनी तक्रार केली. तसंच नाराजी व्यक्त करत गोंधळ घातला. सुरुवातीला गावकऱ्यांच्या तक्रारीकडे मतदान अधिकाऱ्यांनी दुर्लक्ष केल्याचं गावकऱ्यांचं म्हणणं आहे. मात्र, आक्रमक झालेल्या ग्रामस्थांमुळं पोलिसांना मध्यस्थी करावी लागली. काही वेळ तणावाचं वातावरण होतं. हा गोंधळ सुरू असतानाच ईव्हीएममध्ये घोळ असल्याच्या तक्रारी अनेक ग्रामस्थांकडून करण्यात आल्या. अखेर मतदान केंद्रावरील अधिकाऱ्यांना त्याची दखल घ्यावी लागली. त्यांनी ईव्हीएममधील घोळाची शाहनिशा करून घेतली. खात्री पटल्यानंतर त्यांनी ईव्हीएममध्ये तांत्रिक बिघाड असल्याचं मान्य केलं. त्यानंतर ईव्हीएम बदलण्यात आलं. त्यानंतर मतदान केंद्रावरील तणाव निवळला, अशी माहिती काही गावकऱ्यांनी प्रसारमाध्यमांना दिली.

Protected Content