मुक्ताईनगर-लाईव्ह ट्रेंडस न्यूज प्रतिनिधी | भरधाव वेगाने धावणार्‍या चारचाकीने दिलेल्या धडकेत भाविकाचा मृत्यू झाल्याची दुर्घटना घडली.
या संदर्भात लाईव्ह ट्रेंडस न्यूजला पोलीस सूत्रांनी दिलेल्या माहितीनुसार शेगाव तालुक्यातील नारायण श्रीपत शेळके (वय ६७) हे आज संत मुक्ताई तिरोभूत सोहळ्यासाठी आले होते. ते नव्या मुक्ताईवरून जुन्या मुक्ताई मंदिराकडे जात असतांना महामार्ग क्रॉस करतांना भरधाव वेगाने धावणार्‍या मारूती सुझुकीसारख्या दिसणार्‍या कारने त्यांना धडक दिली. यात त्यांचा मृत्यू झाला.
या संदर्भात सागर हरीभाऊ पाटील ( वय २७, रा. सुळे, ता. मुक्ताईनगर) यांनी दिलेल्या फिर्यादीवरून मुक्ताईनगर पोलीस स्थानकात गुन्हा नोंदविण्यात आला आहे. पुढील तपास पोलीस निरिक्षक शंकर शेळके यांच्या मार्गदर्शनाखाली उपनिरिक्षक परवीन तडवी, हवालदार मोहंमद तडवी आणि कॉन्स्टेबल गजमल पाटील हे करीत आहेत.
दरम्यान, राष्ट्रीय महामार्गावर दिशादर्शक फलक नसल्यामुळे बर्‍याच भाविकांना नेमका रस्ता समजत नाही. यातूनच हा अपघात घडल्याचे दिसून येत आहे. यामुळे येथे तातडीने दिशादर्शक फलक लावण्याची मागणी होत आहे.
