मुक्ताईनगर-लाईव्ह ट्रेंड्स न्यूज प्रतिनिधी । मुक्ताईनगर तालुक्यातील एका गावात सहा वर्षीय चिमुकलीवर अत्याचार झाल्याची गंभीर घटना समोर आली आहे. या प्रकरणी पोलिसांनी १७ वर्षीय संशयिताला ताब्यात घेतले असून, त्याच्याविरुद्ध पॉक्सो कायद्यासह भारतीय न्याय संहितेतील विविध कलमांनुसार गुन्हा दाखल करण्यात आला आहे.
मिळालेल्या माहितीनुसार, पीडित चिमुकलीच्या घराचे बांधकाम सुरू होते. घटनेच्या वेळी ती आपल्या लहान बहिणीसोबत घराच्या वरच्या मजल्यावर लपंडाव खेळत होती. खेळताना ती वरच्या मजल्यावर जाऊन लपली होती. त्यावेळी तेथे बांधकामाच्या कामासाठी आलेल्या १७ वर्षीय संशयिताने तिला पकडून तिच्यावर अत्याचार केल्याचा आरोप आहे. ही घटना काल दुपारी साडेचार वाजेच्या सुमारास घडल्याची माहिती आहे. घटनेची माहिती मिळताच पोलिसांनी तातडीने दखल घेत संशयिताला ताब्यात घेतले. त्यानंतर या प्रकरणी कायदेशीर प्रक्रिया सुरू करण्यात आली. पोलिसांनी दिलेल्या माहितीनुसार, संशयिताविरुद्ध पॉक्सो कायद्यासह भारतीय न्याय संहितेतील विविध कलमांनुसार गुन्हा दाखल करण्यात आला आहे. पीडित बालिकेची ओळख कायद्यानुसार गोपनीय ठेवण्यात आली आहे.
दरम्यान, या प्रकरणाचा पुढील तपास पोलीस उपनिरीक्षक जयेश पाटील करीत आहेत. घटनेशी संबंधित सर्व बाबींची चौकशी केली जात असून, उपलब्ध पुरावे आणि तपासातून समोर येणाऱ्या तथ्यांच्या आधारे पुढील कायदेशीर कारवाई केली जाणार आहे. अल्पवयीन मुलीशी संबंधित या गंभीर घटनेमुळे परिसरात चिंता व्यक्त होत आहे. प्रकरणाची सखोल चौकशी करून दोषी आढळणाऱ्यांवर कायद्यानुसार कठोर कारवाई करावी, अशी मागणी नागरिकांकडून होत आहे.
