नवी दिल्ली (वृत्तसंस्था) काल २८ मे रोजी टाइमच्या वेबसाइटवर प्रसिद्ध झालेल्या मोदींवरील ताज्या लेखाचे शीर्षक हे १० मे या दिवशी प्रसिद्ध झालेल्या टाइममधील लेखाच्या शिर्षकाहून अगदी उलटे आहे. ताज्या लेखाचे शिर्षक आहे- ‘मोदी हॅज यूनायटेड इंडिया लाइक नो प्राइम मिनिस्टर इन डेकेड्स’, अर्थात… मोदींनी जसे भारताला एकजूट केले असे दशकांमध्ये इतर कोणत्याही पंतप्रधानाने केले नाही. लोकसभा निवडणुकीदरम्यान पंतप्रधान नरेंद्र मोदी यांना ‘डिव्हायडर इन चिफ’ असे संबोधणाऱ्या प्रसिद्ध आंतरराष्ट्रीय मॅगझीन ‘टाइम’ने लोकसभा निवडणुकीत मिळालेल्या अभूतपूर्व यशानंतर मात्र घुमजाव करत मोदींचा गौरव केला आहे.
मनोज लडवा यांनी हा लेख लिहिला आहे. लडवा यांनी २०१४ च्या लोकसभा निवडणुकीत ‘नरेंद्र मोदी फॉर पीएम’ हे अभियान चालवले होते. मोदी यांच्या सामाजिकदृष्ट्या प्रगतीशील धोरणांनी अवघ्या भारतियांना (यात हिंदू आणि धार्मिक अल्पसंख्याक अंतर्भूत) गरिबीतून बाहेर काढले. हे कोणत्याही मागील सरकारांच्या तुलनेत अतिशय वेगाने झाले आहे, असे लेखात नमूद करण्यात आले आहे. लडवा यांनी लेखात पुढे म्हटले आहे की, ‘मोदींच्या धोरणांवर कटु आणि बहुधा अन्यायकारक टीकेनंतर त्यांनी गेल्या कार्यकालात आणि या निवडणुकीत गेल्या पाच दशकांमध्ये इतर कोणत्याही पंतप्रधानाने केले नाही, अशाप्रकारे त्यांनी भारतीयांना एकजूट केले आहे.’
पंतप्रधान मोदी यांच्यावरील हा लेख टाइम मॅगझीनच्या १० मेच्या अंकात प्रकाशित पत्रकार आतिश तासीर यांच्या कव्हर स्टोरीहून अगदीच वेगळा आहे. त्या लेखात तासीर यांनी मॉब लिंचिंग आणि योगी आदित्यनाथ यांना यूपीच्या मुख्यमंत्रिपदी बसवण्यावरून मोदींवर ताशेरे ओढले होते. हा लेख निवडणुकीच्या काळात प्रसिद्ध झाल्यामुळे त्याला भारतात मोठी प्रसिद्धीही मिळाली. हा लेख प्रसिद्ध झाल्यानंतर मोदी समर्थकांनी त्यावर कठोर शब्दात टीका केली, तर मोदींच्या विरोधकांनी मात्र त्याचे स्वागत केले. पंतप्रधान मोदी यांची प्रशंसा करणारा ताजा लेख ‘टाइम’च्या वेबसाइटवर सर्वाधिक वाचला गेला आहे. या लेखात मोदींचा एक व्हिडिओ देखील पाहायला मिळतो. कोणासोबतही कोणत्याही प्रकारचा भेदभाव केला जाणार नाही असे, मोदी या व्हिडिओद्वारे सांगताना दिसत आहेत.
