जळगाव-लाईव्ह ट्रेंड्स न्यूज प्रतिनिधी । जळगावच्या समृद्ध वाचन परंपरेचा वारसा जपणाऱ्या वल्लभदास वालजी (व. वा.) जिल्हा वाचनालयाला १५० वर्षे पूर्ण होत असल्याच्या औचित्याने वाचनालयाकडे जाणाऱ्या रस्त्याला ‘व. वा. जिल्हा वाचनालय मार्ग’ असे नाव देण्यात आले आहे. खासदार स्मिताताई वाघ आणि जळगाव शहर महानगरपालिकेच्या महापौर दीपमाला काळे यांच्या हस्ते या मार्गाचे उद्घाटन उत्साहात पार पडले. महापौर दीपमाला काळे यांच्या पुढाकाराने नामकरणाची प्रशासकीय प्रक्रिया पूर्ण झाली असून, या निर्णयामुळे शहराच्या सांस्कृतिक आणि वाचन परंपरेला नवी ओळख मिळाली आहे.
जळगाव शहरातील महात्मा गांधी रोडवरील अमर रगडा येथून वाचनालयाकडे वळणाऱ्या रस्त्यावर ‘व. वा. जिल्हा वाचनालय मार्ग’ असा दिशादर्शक नामफलक लावण्यात आला आहे. या नामफलकामुळे परिसराच्या सौंदर्यात भर पडली असून, वाचनालयाच्या दीडशे वर्षांच्या गौरवशाली प्रवासाची ओळखही अधोरेखित झाली आहे. वाचन संस्कृतीचे महत्त्व नव्या पिढीपर्यंत पोहोचविणे आणि शहराच्या ऐतिहासिक संस्थेचा वारसा जतन करणे, हा या नामकरणामागील महत्त्वाचा उद्देश आहे.
व. वा. जिल्हा वाचनालयाला १५० वर्षे पूर्ण होत असल्याच्या पार्श्वभूमीवर वाचनालय प्रशासनाने वाचनालयाकडे जाणाऱ्या रस्त्याला संस्थेचे नाव देण्याची मागणी महापौर दीपमाला काळे यांच्याकडे केली होती. या मागणीच्या अनुषंगाने आवश्यक प्रस्ताव मागविण्यात आले. त्यानंतर महापौर दीपमाला काळे यांनी खासदार स्मिताताई वाघ आणि आमदार राजूमामा भोळे यांच्या मार्गदर्शनाखाली जळगाव महानगरपालिकेच्या महासभेत नामकरणाचा प्रस्ताव मांडला.
महानगरपालिकेच्या महासभेतील ठराव क्रमांक ६५ नुसार या प्रस्तावाला मंजुरी देण्यात आली. त्यानुसार रस्त्याचे अधिकृत नामकरण करून उद्घाटनाचा कार्यक्रम आयोजित करण्यात आला. महापौर दीपमाला काळे यांच्या पुढाकारामुळे नामकरणाची प्रक्रिया पूर्ण झाल्याने वाचनालय प्रशासनाने त्यांचे विशेष आभार मानले. शहरातील ऐतिहासिक आणि सांस्कृतिक वारसा जपण्याच्या दृष्टीने हा निर्णय महत्त्वपूर्ण मानला जात आहे.
या नामकरण व उद्घाटन सोहळ्याला जळगाव महानगरपालिकेचे आयुक्त आदित्य जीवने, जिल्हा पोलीस अधीक्षक श्रीकांत धिवरे, जैन उद्योग समूहाचे अध्यक्ष अशोकभाऊ जैन यांच्यासह व. वा. जिल्हा वाचनालयाचे अध्यक्ष डॉ. प्रदीप जोशी, उपाध्यक्ष ॲड. सुशील अत्रे, कार्याध्यक्ष सीए अनिलकुमार शाह आणि चिटणीस प्रा. डॉ. शुभदा कुलकर्णी यांची प्रमुख उपस्थिती होती. मान्यवरांच्या उपस्थितीत झालेल्या या कार्यक्रमातून वाचनालयाच्या दीडशे वर्षांच्या वाटचालीचा गौरव करण्यात आला.
दरम्यान, १५ ऑक्टोबर रोजी साजऱ्या होणाऱ्या ‘वाचन प्रेरणा दिना’चे औचित्य साधून नामफलकाचे उद्घाटन करण्यात आले. वाचनाची आवड वाढविणे, नागरिकांना पुस्तकांकडे आकर्षित करणे आणि वाचन संस्कृतीला प्रोत्साहन देणे, या उद्देशाने वाचनालयात विशेष वाचन कार्यक्रमाचे आयोजन करण्यात आले आहे. या उपक्रमांतर्गत नागरिकांनी वाचनालयात येऊन किमान १० मिनिटे पुस्तकांचे वाचन करावे, असे आवाहन करण्यात आले आहे.
या विशेष उपक्रमाची नोंद विविध रेकॉर्ड बुकमध्ये करण्याचाही प्रयत्न केला जात आहे. त्यामुळे वाचन प्रेरणा दिनानिमित्त नागरिकांचा वाचनातील सहभाग वाढविण्यासोबतच वाचन संस्कृतीचा संदेश व्यापक स्तरावर पोहोचविण्याचा प्रयत्न होत आहे.
व. वा. जिल्हा वाचनालयाच्या दीडशे वर्षांच्या गौरवशाली परंपरेला समर्पित ‘व. वा. जिल्हा वाचनालय मार्ग’ हे नामकरण जळगावच्या सांस्कृतिक वारशात भर घालणारे ठरले आहे. वाचन प्रेरणा दिनानिमित्त आयोजित विशेष उपक्रमातून पुस्तकांशी नाते जोडण्याचा संदेशही नागरिकांपर्यंत पोहोचत आहे.
