फैजपूर-लाईव्ह ट्रेंड्स न्यूज प्रतिनिधी । लेवा पाटीदार समाजातील युवकांना एकत्र आणणाऱ्या आणि सामाजिक एकोपा वाढवणाऱ्या लेवा रत्न कवयित्री बहिणाबाई चौधरी चषक पर्व 2 या भव्य क्रिकेट स्पर्धेच्या आयोजनासाठी तयारीला वेग आला आहे. आगामी 24 ते 29 जानेवारी 2026 या कालावधीत ही स्पर्धा होणार असून, त्यासंदर्भातील आयोजन समितीची महत्त्वपूर्ण बैठक काल फैजपूर येथील श्री खंडेराव मंदिर परिसरात उत्साहात पार पडली.
या बैठकीत स्पर्धेच्या नियोजनावर सविस्तर चर्चा करण्यात आली. आयोजन समितीचे सदस्य किशोर सुधाकर चौधरी यांनी माहिती देताना सांगितले की, लेवा पाटीदार समाजात ऐक्य, बंधुभाव आणि एकता कायम राहावी, तसेच समाजातील सर्व वयोगट विशेषतः युवक वर्ग एकत्र यावा, या उद्देशाने या क्रिकेट स्पर्धेचे आयोजन करण्यात येत आहे. समाजातील खेळाडूंना व्यासपीठ मिळावे आणि परस्पर स्नेह वाढावा, हा या उपक्रमाचा मुख्य हेतू असल्याचे त्यांनी स्पष्ट केले.
यावेळी अमोल चौधरी यांनी स्पर्धेच्या संपूर्ण नियोजनाची माहिती उपस्थित कार्यकर्त्यांसमोर मांडली. या स्पर्धेत फैजपूर, सावदा, खिरोदा, सांगवी, कळमोदा, मस्कावद आणि वरणगाव येथील युवकांचा सक्रिय सहभाग राहणार असल्याचे त्यांनी सांगितले. समाजातील सर्व बांधवांनी सामन्यांना मोठ्या संख्येने उपस्थित राहून युवकांचे मनोबल वाढवावे, असे आवाहनही त्यांनी केले.
बैठकीदरम्यान सामन्यांचे वेळापत्रक, मैदान व्यवस्था, संघनोंदणी, शिस्त व सुरक्षेच्या दृष्टीने आवश्यक उपाययोजना यावरही चर्चा करण्यात आली. स्पर्धा यशस्वी होण्यासाठी सर्वांनी समन्वयाने काम करण्याचा निर्धार व्यक्त केला. युवकांमध्ये क्रीडाविषयक आवड निर्माण करण्यासोबतच सामाजिक जबाबदारीची जाणीव वाढवण्याचा हा प्रयत्न असल्याचे मत उपस्थितांनी व्यक्त केले.
या बैठकीला विकास कोल्हे, जयेश येवले, चंदन टोके, जिग्नेश चौधरी, सुमित चौधरी, दिगंबर राणे, चिन्मय वाघुळदे, जितेंद्र वाघुळदे, भूषण धांडे, जयेश फेगडे, रोशन इंगळे, रोशन चौधरी, गिरीश पाटील, निहार पाटील, प्रथम देवकर, सांगवीचे सरपंच अतुल दादा, योगेश चौधरी यांच्यासह आजूबाजूच्या गावांतील अनेक युवक मंडळी उपस्थित होती.
एकूणच, लेवा रत्न कवयित्री बहिणाबाई चौधरी चषक पर्व 2 ही स्पर्धा केवळ क्रिकेटपुरती मर्यादित न राहता समाजातील एकजूट, युवकांचा उत्साह आणि सांस्कृतिक ओळख जपणारा मोठा उपक्रम ठरणार असल्याचे चित्र या बैठकीतून स्पष्ट झाले आहे.
