मुक्ताईनगर-लाईव्ह ट्रेंड्स न्यूज प्रतिनिधी । मुक्ताईनगर तालुक्यातील वडगाव येथे अल्पवयीन मुलीचा विवाह लावण्यात आल्याची धक्कादायक घटना समोर आल्याने परिसरात मोठी खळबळ उडाली आहे. अवघ्या १६ वर्षे ११ महिने वयाच्या मुलीचा विवाह लावण्यात आल्याप्रकरणी पोलिसांनी मुलीच्या आई-वडिलांसह पाच जणांविरोधात बालविवाह प्रतिबंधक अधिनियमांतर्गत गुन्हा दाखल केला आहे. संबंधित गुन्हा झिरो नंबरने मुक्ताईनगर पोलीस ठाण्यात वर्ग करण्यात आला असून पुढील तपास सुरू आहे.
पोलिसांकडून मिळालेल्या माहितीनुसार, ३ मे रोजी वडगाव येथील महादेव मंदिरात हा विवाह पार पडला. संबंधित मुलगी अल्पवयीन असल्याची माहिती असूनही विवाह लावण्यात आल्याचा आरोप करण्यात आला आहे. विवाह सोहळ्यासाठी काही मध्यस्थांनी पुढाकार घेतल्याचेही प्राथमिक तपासात उघड झाले असून या प्रकरणात अनेकांच्या भूमिकेची चौकशी सुरू करण्यात आली आहे.
दरम्यान, अल्पवयीन मुलीचे भविष्य धोक्यात येत असल्याची जाणीव झाल्यानंतर तिच्या आजी सुरपाबाई बाबुराव जामुनकर (रा. उमापूर, जि. बुलढाणा) यांनी पोलिसांत धाव घेत तक्रार दाखल केली. तक्रार प्राप्त होताच पोलिसांनी तातडीने कारवाई करत संबंधितांविरोधात गुन्हा नोंदवला. या प्रकरणामुळे बालविवाहासारख्या सामाजिक समस्येचा प्रश्न पुन्हा ऐरणीवर आला आहे.
या प्रकरणात रामचंद्र बाबुराव जामुनकर, बबिता रामचंद्र जामुनकर, झुंमकलाल हिरा धांडेकर, गजानन रमेश मांजरे (रा. धानोरा) आणि तुकाराम उर्फ मयुर पाटील (रा. महालखेडा) यांच्याविरोधात बालविवाह प्रतिबंधक अधिनियम २००६ मधील कलम ९, १० आणि ११ अंतर्गत गुन्हा दाखल करण्यात आला आहे. संबंधितांनी अल्पवयीन मुलीचा विवाह लावण्यासाठी सक्रिय सहभाग घेतल्याचा आरोप पोलिसांनी नोंदवला आहे.
घटनेनंतर परिसरात विविध स्तरांतून संताप व्यक्त करण्यात येत असून सामाजिक संघटनांनीही या प्रकाराची गंभीर दखल घेण्याची मागणी केली आहे. बालविवाह रोखण्यासाठी प्रशासनाने अधिक कठोर उपाययोजना करण्याची आवश्यकता असल्याची भावना नागरिकांकडून व्यक्त होत आहे. अल्पवयीन मुलींच्या शिक्षण, आरोग्य आणि सुरक्षिततेच्या दृष्टीने अशा घटनांवर कठोर कारवाई होणे गरजेचे असल्याचे मतही व्यक्त केले जात आहे.
या संपूर्ण प्रकरणाचा पुढील तपास मुक्ताईनगर पोलीस करत असून संबंधितांकडून अधिक माहिती घेतली जात आहे. तपासानंतर आणखी काही बाबी समोर येण्याची शक्यता पोलिसांनी वर्तवली आहे.
