चोपडा-लाईव्ह ट्रेंडस न्यूज प्रतिनिधी । चोपडा तालुक्यातील निमगव्हाण येथे गांजाची तस्करी करणाऱ्या एका आरोपीला चोपडा ग्रामीण पोलिसांनी अटक केली आहे. पोलिसांनी १ लाख ३४ हजार रुपयांचा गांजा जप्त केला आहे. गोपनीय माहितीच्या आधारे ही कारवाई करण्यात आली. या प्रकरणी आरोपीविरुद्ध गुन्हा दाखल करण्यात आला असून, पोलिसांचा तपास सुरू आहे.
पोलिसांनी सापळा रचला
चोपडा ग्रामीण पोलिसांना मिळालेल्या गोपनीय माहितीच्या आधारे पोलीस अधीक्षक डॉ. माहेश्वर, सहाय्यक पोलीस अधीक्षक कविता नेरकर, चोपडा विभागीय पोलीस अधिकारी अण्णासाहेब घोलप यांच्या मार्गदर्शनाखाली पोलिसांनी सापळा रचला. चोपडा ते धरणगाव मार्गावरील निमगव्हाण बसस्थानकाजवळ संशयित हालचाली आढळल्यानंतर पोलिसांनी एका स्कूटीस्वाराला थांबवले.
७ किलोहून अधिक गांजा जप्त
पोलिसांनी संशयित आरोपी अमित दिलीप बरडे (वय २२, रा. दोंदवाडे जोगवाडा, ता. नेवाली, जि. बडवाणी, मध्य प्रदेश) याची तपासणी केली असता, त्याच्याकडे एका पिवळ्या प्लास्टिकच्या पिशवीत ७९,००० रुपये किंमतीचा ७ किलो ९१८ ग्रॅम गांजा आढळून आला. तसेच, पारदर्शक प्लॅस्टिकच्या पिशवीत ५५,००० रुपये किंमतीचा ५ किलो ५६५ ग्रॅम गांजा देखील सापडला. पोलिसांनी आरोपी आणि गांजा वाहतुकीसाठी वापरलेली टीव्हीएस ज्युपिटर (क्र. MP-46-ZC-6443) स्कूटी आणि iPhone 15 मोबाईल जप्त केले आहेत.
गुन्हा दाखल, पुढील तपास सुरू
या प्रकरणी चोपडा ग्रामीण पोलिस ठाण्यात एनडीपीएस कायद्यानुसार (कलम २०(ब), २२) गुन्हा दाखल करण्यात आला आहे. पोलिसांनी आरोपीला ताब्यात घेतले असून, तो गांजा कुठून आणला आणि कुणाला पुरवठा करणार होता, याचा तपास सुरू आहे. चोपडा ग्रामीण पोलिसांनी केलेल्या या कारवाईमुळे तालुक्यातील अंमली पदार्थ तस्करीवर मोठा आळा बसणार असल्याचे बोलले जात आहे.
