जळगाव – लाईव्ह ट्रेंड्स न्यूज प्रतिनिधी । महाराष्ट्र प्रदेश काँग्रेस कमिटीच्या ‘संघटन सृजन अभियान’ अंतर्गत राज्यभरात संघटनात्मक पुनर्रचनेला वेग देण्यात आला असून, त्याचाच भाग म्हणून जळगाव जिल्ह्यातील विविध ब्लॉक अध्यक्षांच्या नियुक्त्या जाहीर करण्यात आल्या आहेत. प्रदेशाध्यक्ष हर्षवर्धन सपकाळ यांच्या आदेशान्वये करण्यात आलेल्या या नियुक्त्यांमुळे जिल्ह्यातील काँग्रेस संघटना अधिक मजबूत व गतिमान होईल, असा विश्वास पक्ष नेतृत्वाने व्यक्त केला आहे.
महाराष्ट्र प्रदेश काँग्रेस कमिटीने राज्यभर सुरू केलेल्या ‘संघटन सृजन अभियान’ अंतर्गत वरिष्ठ निरीक्षकांनी नुकताच जळगाव जिल्ह्याचा दौरा केला होता. या दौऱ्यात त्यांनी जिल्ह्यातील प्रमुख काँग्रेस नेते, पदाधिकारी आणि निष्ठावंत कार्यकर्त्यांशी थेट संवाद साधून संघटनात्मक स्थितीचा आढावा घेतला. स्थानिक स्तरावरील चर्चेनंतर निरीक्षकांनी ब्लॉक अध्यक्ष नियुक्तीसंदर्भातील अहवाल व शिफारसी प्रदेश कार्यालयाकडे सादर केल्या. त्या शिफारसींचा विचार करून नव्या नियुक्त्यांना अंतिम मंजुरी देण्यात आली. जळगाव महानगरात पश्चिम ब्लॉक अध्यक्षपदी अनंत नितीनचंद परिहार, उत्तर ब्लॉक अध्यक्षपदी ज्ञानेश्वर शेनपडू कोळी आणि पूर्व ब्लॉक अध्यक्षपदी धर्मकांत सिद्धार्थ भालेराव यांची नियुक्ती करण्यात आली आहे. या तिन्ही नियुक्त्यांमुळे महानगरातील पक्ष संघटना अधिक प्रभावीपणे कार्य करेल, असा विश्वास व्यक्त करण्यात आला आहे.
याशिवाय जळगाव ग्रामीण पश्चिम विभागात चाळीसगाव शहर ब्लॉक अध्यक्षपदी प्रा. नितीन राजपूत, चाळीसगाव ग्रामीण वाडीलाल पंडीतराव चव्हाण, एरंडोल ग्रामीण सुनील गोविंद पाटील, पाचोरा शहर शेख शकील शेख इब्राहिम, पारोळा शहर भिकाजी भाऊराव अहिरे, पारोळा ग्रामीण संजय लटकन पाटील आणि भडगाव-एरंडोल शहर ब्लॉक अध्यक्षपदी अॅड. शोएब जमिल मिर्झा यांची नियुक्ती जाहीर करण्यात आली आहे. जळगाव ग्रामीण पूर्व विभागात रावेर शहर ब्लॉक अध्यक्षपदी संघरक्षक तायडे, चोपडा ग्रामीण मोहन देवराम पाटील, चोपडा शहर अशोक माणिकराव साळुंखे, बोधवड ग्रामीण, मुक्ताईनगर ग्रामीण पुंजाजी पाटील आणि संजय पाटील यांच्याकडे जबाबदारी सोपविण्यात आली आहे. पक्षाच्या मते, या नियुक्त्यांमुळे ग्रामीण भागात संघटनात्मक कामकाजाला अधिक चालना मिळणार आहे.
प्रदेश नेतृत्वाने सर्व नवनियुक्त पदाधिकाऱ्यांचे अभिनंदन करत पक्षवाढ, जनसंपर्क आणि संघटन विस्तारासाठी प्रभावीपणे कार्य करण्याच्या शुभेच्छा दिल्या आहेत. आगामी स्थानिक स्वराज्य संस्था निवडणुका आणि इतर राजकीय घडामोडींच्या पार्श्वभूमीवर या नियुक्त्यांना विशेष महत्त्व प्राप्त झाले आहे. जळगाव महानगर काँग्रेस कमिटीचे महानगराध्यक्ष जमील शेख यांनी प्रसिद्धीपत्रकाद्वारे या नियुक्त्यांची माहिती दिली असून, नव्या नेतृत्वामुळे पक्ष संघटना अधिक सक्षम, सक्रिय आणि जनाधार वाढविण्यासाठी प्रभावी ठरेल, असा विश्वास व्यक्त केला आहे.
