जळगाव-लाईव्ह ट्रेंडस न्यूज प्रतिनिधी । कवयित्री बहिणाबाई चौधरी उत्तर महाराष्ट्र विद्यापीठाच्या विचारधारा प्रशाळेतर्फे बुद्ध पौर्णिमेचे औचित्य साधून एका विशेष काव्य अभिवाचन कार्यक्रमाचे आयोजन करण्यात आले होते. या कार्यक्रमात भगवान बुद्धांवर आधारित प्रा. डॉ. म. सु. पगारे यांच्या ‘बा तथगता’ या महत्त्वपूर्ण काव्याचे मराठी, इंग्रजी, हिंदी आणि अहिराणी या चार भाषांमध्ये रसपूर्ण अभिवाचन करण्यात आले.
कार्यक्रमाच्या अध्यक्षस्थानी विद्यापीठाचे प्र.कुलगुरु प्रा. डॉ. एस. टी. इंगळे यांनी मार्गदर्शन केले. प्रमुख अतिथी म्हणून वाणिज्य विद्याशाखेचे अधिष्ठाता डॉ. अनिल डोंगरे, संगणक प्रशाळेचे संचालक डॉ. राकेश रामटेक, सामाजिकशास्त्रे प्रशाळेचे संचालक डॉ. अजय पाटील आणि स्पर्धा परीक्षा केंद्राचे संचालक डॉ. अजय सुरवाडे यांची प्रमुख उपस्थिती होती.
या अद्वितीय कार्यक्रमात ‘बा तथगता’ या विशाल काव्यातील निवडक भागांचे वेगवेगळ्या वक्त्यांनी अभिवाचन केले. मराठी भाषेत प्रा. डॉ. अनिल डोंगरे, श्री. गौरव हरताळे, प्रा. दीपक खरात, भारती सोनवणे आणि महेश सूर्यवंशी यांनी आपल्या प्रभावी शैलीत काव्य सादर केले. इंग्रजी विभागातून प्रा. डॉ. सुदर्शन भवरे आणि प्रा. प्रतिभा गलवाडे यांनी इंग्रजीतील भावानुवाद वाचून दाखवला. हिंदी भाषेतील अभिवाचन प्रा. डॉ. प्रीती सोनी आणि प्रा. स्नेहा गायकवाड यांनी केले, तर अहिराणी या स्थानिक बोलीभाषेत प्रा. कृष्णा संदानशिव आणि श्री. खेमराज पाटील यांनी काव्याला एक वेगळा रंग दिला.
संपूर्ण कार्यक्रमाचे सुंदर निवेदन आणि प्रभावी संचालन प्रा. डॉ. म. सु. पगारे यांनी केले, ज्यामुळे श्रोत्यांना काव्याचा अर्थ आणि महत्त्व अधिक चांगल्या प्रकारे समजला. कार्यक्रमाच्या शेवटी उपस्थितांना खीरदान (बुद्ध पौर्णिमेनिमित्त विशेष प्रसाद) देण्यात आले.
बौद्ध अध्ययन व संशोधन केंद्राचे प्रमुख डॉ. संतोष खिराडे यांनी आभार प्रदर्शन केले. याप्रसंगी प्रा. डॉ. पवित्रा पाटील, डॉ. रोहन कोष्टी, प्रा. डॉ. नितीन बडगुजर, प्रा. डॉ. विजय घोरपडे, भिमराव तायडे, भरत पालोदकर, चंद्रकांत वानखेडे, अनिल बिऱ्हाडे, किरण पाटील यांच्यासह विविध प्रशाळांचे विद्यार्थी आणि कर्मचारी मोठ्या संख्येने उपस्थित होते. ‘बा तथगता’ काव्याचे चार भाषांतील अभिवाचन हा अनुभव उपस्थितांसाठी निश्चितच अविस्मरणीय ठरला.
