भुसावळ लाईव्ह ट्रेंडस न्यूज प्रतिनिधी । भुसावळ शहरातील कवाडे नगर परिसरात कर्जहप्त्याच्या किरकोळ वादातून एका तरुणावर चाकूने हल्ला करून त्याला गंभीर जखमी केल्याची धक्कादायक घटना घडली. या घटनेने परिसरात प्रचंड खळबळ उडाली असून, भुसावळ शहर पोलिसांनी अवघ्या काही तासांतच या प्रकरणातील दोन संशयित आरोपींना अटक करून कायद्याचा धाक दाखवला आहे.
घटनेचा तपशील:
कवाडे नगर येथील रहिवासी रत्नमाला शरद बाविस्कर वय-३८ आणि त्यांचा मुलगा प्रतीक शरद बाविस्कर हे घरी बसले असताना, रेखा उर्फ छकुबाई दीपक म्यांद्रे ही कर्जाचे हप्ते भरण्यावरून वाद घालत त्यांच्या घरी आली. छकुबाईने या मुद्द्यावरून तीव्र राग व्यक्त केला आणि आपल्यासोबत आणखी चौघांना घेऊन प्रतीक आणि रत्नमाला बाविस्कर यांच्यावर हल्ला चढवला. या हल्ल्यात प्रतीक बाविस्कर याच्यावर चाकूने वार करण्यात आले, ज्यामुळे तो गंभीर जखमी झाला. तसेच, रत्नमाला बाविस्कर व त्यांच्या आईलाही मारहाण झाली. जखमी अवस्थेत तिघांनाही तातडीने रुग्णालयात दाखल करण्यात आले आहे.
पोलिसांची तत्पर कारवाई
घटनेची माहिती मिळताच भुसावळ शहर पोलिस ठाण्याचे पोलिस निरीक्षक उद्धव डमाळे यांच्या सूचनेनुसार पोलिस पथक तात्काळ घटनास्थळी दाखल झाले. विभागीय पोलिस अधिकारी संदीप गावित यांनीही भेट देत परिस्थितीची पाहणी केली. रत्नमाला शरद बाविस्कर यांच्या फिर्यादीवरून पोलिसांनी तात्काळ गुन्हा दाखल करत अवघ्या काही तासांतच दोन संशयितांना ताब्यात घेतले. याप्रकरणी भुसावळ शहर पोलीस ठाण्यात गुन्हा दाखल करण्यात आला आहे.
