रावेर-लाईव्ह ट्रेंड्स न्यूज प्रतिनिधी । रावेर शहरातील खासगी रुग्णालयांनी विविध मागण्यांसाठी बेमुदत संप पुकारल्याने रुग्णांची मोठी गैरसोय होत आहे. इंडियन मेडिकल असोसिएशन (IMA) ताप्ती व्हॅली शाखेच्या नेतृत्वाखाली डॉक्टरांनी रावेर तहसीलदारांना निवेदन देत CCMP पात्रता असलेल्या BHMS डॉक्टरांची महाराष्ट्र मेडिकल कौन्सिल (MMC) मधील नोंदणी थांबविण्याची मागणी शासनाकडे केली आहे. या आंदोलनामुळे वैद्यकीय सेवा विस्कळीत झाल्याने रुग्णांना उपचारासाठी अन्य शहरांकडे धाव घ्यावी लागत आहे.
इंडियन मेडिकल असोसिएशन ताप्ती व्हॅलीच्या सावदा-रावेर-फैजपूर-यावल शाखेतर्फे आयोजित आंदोलनात डॉक्टरांनी शासनाच्या धोरणाविरोधात तीव्र नाराजी व्यक्त केली. संघटनेच्या वतीने रावेर तहसीलदारांना निवेदन सादर करून CCMP पात्रता असलेल्या BHMS डॉक्टरांना महाराष्ट्र मेडिकल कौन्सिलमध्ये नोंदणी देण्याची प्रक्रिया तातडीने थांबविण्याची मागणी करण्यात आली.
डॉक्टरांचे म्हणणे आहे की, वैद्यकीय क्षेत्रातील गुणवत्तापूर्ण आणि सुरक्षित आरोग्य सेवा अबाधित ठेवण्यासाठी वैद्यकीय व्यवसायासंदर्भातील नियमांची काटेकोर अंमलबजावणी होणे आवश्यक आहे. शासनाने या विषयाकडे गांभीर्याने लक्ष देऊन योग्य निर्णय घ्यावा, अशी मागणी आंदोलनकर्त्या डॉक्टरांनी केली. दरम्यान, रावेर शहरातील अनेक खासगी रुग्णालये आणि दवाखाने बंद असल्यामुळे उपचारासाठी आलेल्या रुग्णांना मोठ्या अडचणींचा सामना करावा लागत आहे. अनेक रुग्णांना शासकीय रुग्णालयांचा आधार घ्यावा लागत असून, काहींना जळगाव, भुसावळ किंवा इतर शहरांकडे उपचारासाठी जावे लागत असल्याने आर्थिक व मानसिक त्रास सहन करावा लागत आहे.
या आंदोलनात आयएमए ताप्ती व्हॅली शाखेचे अध्यक्ष डॉ. संदीप पाटील, सचिव डॉ. सुचिता कूयटे, डॉ. योगिता पाटील, डॉ. योगेश पाटील, डॉ. दत्तप्रसाद दलाल, डॉ. प्रविण चौधरी यांच्यासह मोठ्या संख्येने डॉक्टर सहभागी झाले होते. आंदोलनादरम्यान शासनाने लवकरात लवकर सकारात्मक निर्णय घ्यावा, अन्यथा आंदोलन अधिक तीव्र करण्याचा इशाराही डॉक्टरांनी दिला. रावेरमधील आरोग्य सेवा पूर्ववत सुरू व्हावी आणि रुग्णांची होणारी गैरसोय दूर व्हावी, यासाठी शासनाने डॉक्टरांच्या मागण्यांवर तातडीने निर्णय घेण्याची अपेक्षा नागरिकांकडून व्यक्त होत आहे.
