पंढरपूर – लाईव्ह ट्रेंड्स न्यूज प्रतिनिधी । पंढरपूर येथील वैकुंठवासी दिगंबर महाराज वारकरी शिक्षण समिती मठामध्ये आज एक महत्त्वपूर्ण कार्यक्रम पार पडला. महाराष्ट्राचे जलसंपदा मंत्री गिरीश महाजन यांच्या हस्ते एक कोटी रुपये खर्चून उभारण्यात आलेल्या भव्य सभा मंडपाचे लोकार्पण उत्साहात पार पडले. हा सोहळा वारकरी भक्तांच्या आणि समाजातील मान्यवरांच्या उपस्थितीत भक्तिभावाने भरलेला होता.
या लोकार्पणप्रसंगी बोलताना मंत्री गिरीश महाजन यांनी मठ व्यवस्थापनास आपल्या शैलीत दिलखुलास आश्वासन दिले. “अजून तुम्ही म्हणाल ते तुमच्या मठासाठी मी देणार. तुम्ही मागत रहा, मी देत जाईन,” असे उद्गार त्यांनी काढताच उपस्थित वारकरी भक्तांमध्ये आनंदाची लाट उसळली. त्यांच्या या आश्वासनाने मठाचा भावी विकास अधिक बळकट होणार असल्याची भावना व्यक्त करण्यात आली.
या कार्यक्रमास यावल तालुक्यातील विविध गावांतील वारकरी भक्तगण मोठ्या संख्येने उपस्थित होते. मुक्ताई मठाचे गायक रवींद्र महाजन यांचे गाणे भक्तीमय वातावरणात भार टाकणारे ठरले. या वेळी मुक्ताई संस्थेचे अध्यक्ष रवींद्र भैय्या पाटील, महामंडलेश्वर जनार्दन हरीजी महाराज भागवत, विश्वनाथ पाटील, मठाचे अध्यक्ष नरेंद्र नारखेडे, घनश्याम पाटील, विठ्ठल भंगाळे, किशोर बोरले, शरद महाजन, धनंजय चौधरी, हिरालाल पाटील, जयराम पाटील, सुनील भंगाळे, जनार्दन भारंबे आणि समस्त विश्वस्त मंडळ उपस्थित होते.
परिसरातील अनेक वारकरी भजनी मंडळांनीही आपल्या भक्तिपूर्ण उपस्थितीने कार्यक्रमात रंग भरला. सभा मंडपाच्या बांधणीसाठी झालेला एक कोटी रुपयांचा खर्च आणि मंत्री महाजन यांची खास उपस्थिती, हे संपूर्ण परिसरासाठी गौरवाचे क्षण ठरले. वारकरी परंपरेचा हा सन्मान, शासन पातळीवर होणारी मदत आणि भाविकांची एकजूट यामुळे पंढरपूरातील धार्मिक आणि सामाजिक कामांमध्ये नवचैतन्य निर्माण होण्यास हातभार लागेल.
