Home Uncategorized जळगाव जिल्हा काँग्रेसची १८ नोव्हेंबरला महत्त्वाची बैठक; पक्षबांधणी अन् ‘वोट बचाओ, देश...

जळगाव जिल्हा काँग्रेसची १८ नोव्हेंबरला महत्त्वाची बैठक; पक्षबांधणी अन् ‘वोट बचाओ, देश बचाओ’ मोहिमेवर चर्चा

0
1

जळगाव-लाईव्ह ट्रेंड्स न्यूज प्रतिनिधी । जळगाव जिल्ह्यात काँग्रेस पक्षाची संघटनात्मक बांधणी अधिक भक्कम करण्यासाठी आणि आगामी राजकीय मोहिमांची रणनीती आखण्यासाठी जळगाव जिल्हा काँग्रेस कमिटीची एक अत्यंत महत्त्वपूर्ण बैठक बुधवार, १८ नोव्हेंबर रोजी आयोजित करण्यात आली असल्याची माहिती जिल्हा काँग्रेस कमिटीचे सरचिटणीस बाबा देशमुख यांनी एका प्रसिद्धीपत्रकाद्वारे दिली आहे. उत्तर महाराष्ट्र प्रभारी हिम्मत सिंग, लोकसभा प्रभारी लक्ष्मणराव काका घुमरे आणि जळगाव जिल्ह्याचे नवनियुक्त प्रभारी प्रा. ज्ञानेश्वर गायकवाड यांच्या प्रमुख उपस्थितीत ही बैठक पार पडणार असून, यामध्ये पक्षवाढ आणि राज्य व राष्ट्रीय स्तरावरील आंदोलनांबाबत सविस्तर चर्चा केली जाणार आहे.

या बैठकीत प्रामुख्याने जिल्ह्यातील काँग्रेसच्या संघटनात्मक वाढीवर विशेष भर दिला जाणार असून, विविध फ्रंटल ऑर्गनायझेशन, सेल आणि आघाड्यांच्या प्रलंबित नियुक्त्या मार्गी लावण्याबाबत विचारविमर्श होईल. तसेच जिल्ह्यातील सर्व ब्लॉक अध्यक्षांच्या आजवरच्या कार्याची समीक्षा करून ब्लॉक कार्यकारिणी, मंडल आणि सेक्टर अध्यक्षांच्या नियुक्त्या करणे तसेच गावपातळीवर ग्राम समित्या स्थापन करण्याच्या विषयांवर सखोल चर्चा होणार आहे. यासोबतच अखिल भारतीय काँग्रेस कमिटीचे पर्यवेक्षक हिम्मत सिंग यांच्या नेतृत्वाखाली ऑक्टोबर ते १५ डिसेंबर या कालावधीत राबविण्यात येणाऱ्या ‘वोट बचाओ, देश बचाओ’ मोहिमेच्या प्रभावी अंमलबजावणीचे नियोजन या बैठकीत केले जाणार आहे.

या मोहिमेअंतर्गत प्रामुख्याने तीन महत्त्वाच्या कार्यक्रमांवर भर दिला जाणार असल्याचे जिल्हा काँग्रेस कमिटीने स्पष्ट केले आहे. यामध्ये ‘वोट बचाओ, देश बचाओ’ अंतर्गत ‘वोट रक्षक’ कार्यक्रमाची अंमलबजावणी करून वोट रक्षकांची नियुक्ती करणे व सामान्य कार्यकर्त्यांसाठी प्रशिक्षण शिबिरांचे आयोजन करणे, आगामी २६ नोव्हेंबर २०२६ रोजी संविधान दिनानिमित्त राज्यस्तरावर होणाऱ्या “संविधान रक्षा मार्च” या कार्यक्रमाची जय्यत तयारी करणे आणि संपूर्ण जिल्ह्यात ग्रामस्तरावर व शहरी भागात ‘वोट बचाओ, देश बचाओ चौपाल’चे आयोजन करणे या विषयांवर सविस्तर मंथन केले जाईल.

नवनियुक्त प्रभारी लक्ष्मणराव काका घुमरे आणि प्रा. ज्ञानेश्वर गायकवाड यांच्या मार्गदर्शनाखाली होणाऱ्या या बैठकीला जिल्हा काँग्रेस अध्यक्ष ॲड. अविनाश भालेराव, प्रदेश उपाध्यक्ष ॲड. संदीप भैय्या पाटील, प्रदेश उपाध्यक्ष योगेंद्रसिंग पाटील, प्रदेश सरचिटणीस हाजी मुक्ती हरून, सेवादलाचे राष्ट्रीय सचिव विनोद कोळपकर, प्रदेश सचिव प्रवीण सुरवाडे, माजी आमदार शिरीष दादा चौधरी, रमेश दादा चौधरी, ॲड. सलीम पटेल, ज्येष्ठ नेते डॉ. ए. जी. भंगाळे, माजी जिल्हाध्यक्ष राजीव दादा पाटील, शाम तायडे, ज्येष्ठ नेते श्रीधर चौधरी, विजय वाणी, माजी जिल्हा बँक संचालक डॉ. सुरेश पाटील, अल्पसंख्याक विभागाचे प्रदेश उपाध्यक्ष मुनवर खान, महिला आयोगाच्या माजी सदस्य जोत्स्ना विसपुते, ओबीसी प्रदेश उपाध्यक्ष विजय महाजन, सरचिटणीस अशोक खलाणे आदी प्रमुख नेते उपस्थित राहणार आहेत. या बैठकीला जिल्हा कार्यकारिणीचे सर्व पदाधिकारी, तालुकाध्यक्ष, शहराध्यक्ष, मंडल व सेक्टर अध्यक्षांसह सर्व फ्रंटल, विभाग आणि सेलच्या पदाधिकाऱ्यांनी मोठ्या संख्येने उपस्थित राहावे, असे आवाहन जिल्हा सरचिटणीस बाबा देशमुख यांनी केले आहे.

जळगाव जिल्हा काँग्रेस कमिटीची महत्त्वपूर्ण बैठक १८ नोव्हेंबर रोजी प्रभारी हिम्मत सिंग, लक्ष्मणराव घुमरे आणि प्रा. ज्ञानेश्वर गायकवाड यांच्या उपस्थितीत होणार आहे. या बैठकीत संघटनात्मक नियुक्त्यांसह ‘वोट बचाओ, देश बचाओ’ मोहीम आणि संविधान दिनानिमित्त होणाऱ्या ‘संविधान रक्षा मार्च’च्या नियोजनावर चर्चा केली जाणार असल्याची माहिती जिल्हा काँग्रेस कमिटीतर्फे देण्यात आली आहे.

Protected Content

Play sound