पारोळा – लाईव्ह ट्रेंड्स न्यूज प्रतिनिधी | तालुक्यातील शिरसोदे येथे अवैध वाळू वाहतूक करणाऱ्या ट्रॅक्टरने १५ वर्षीय अल्पवयीन मजुराचा बळी घेतल्याची दुर्दैवी घटना आज पहाटे तीन वाजता बोरी नदीपात्रात घडली. ट्रॅक्टर रिव्हर्स घेत असताना ट्रॉलीच्या धडकेत हा मजूर जागीच ठार झाला. या घटनेनंतर चालक आणि मालकाविरोधात गुन्हा दाखल करून चालकाला अटक करण्यात आली आहे.
शिरसोदे (ता. पारोळा) येथील बोरी नदीपात्रात अवैध वाळू उपसा सुरू असताना MH 19 CY 1236 क्रमांकाच्या ट्रॅक्टरची ट्रॉली मागे घेत असताना १५ वर्षीय देवा उर्फ गौतम गोकुळ भिल याला जोरदार धडक बसली. त्याच्या डोक्याला गंभीर दुखापत झाल्याने तो जागीच बेशुद्ध पडला. चालक अजय देवमन भिल याने जखमीच्या भावाला घटनेची माहिती दिली. त्यानंतर बहादरपूर सरकारी रुग्णालयात नेले असता वैद्यकीय अधिकाऱ्यांनी त्याला मृत घोषित केले.
या घटनेनंतर ट्रॅक्टर चालक अजय भिल आणि ट्रॅक्टर मालक समाधान शंकर पाटील (रा. शिरसोदे, ता. पारोळा) यांच्याविरोधात गुन्हा दाखल करण्यात आला असून, चालकास वाहनासह पोलिसांनी अटक केली आहे.
या घटनेमुळे परिसरात संतापाची लाट उसळली आहे. तालुक्यात मोठ्या प्रमाणात अवैध वाळू वाहतूक सुरू असून महसूल आणि पोलीस प्रशासन याकडे दुर्लक्ष करत आहे, अशी नागरिकांची तीव्र नाराजी आहे. वरिष्ठ अधिकाऱ्यांनी लक्ष घालून ही अवैध वाळू वाहतूक थांबवावी, अशी मागणी स्थानिकांकडून केली जात आहे.
