जळगाव-लाईव्ह ट्रेंडस न्यूज प्रतिनिधी । जळगाव शहरातील चंदूअण्णा नगरात राहणाऱ्या एका तरूणाने खासगी सावकारीकडून पैशांसाठीचा तगादा आणि धमक्यांना कंटाळून घरात कुणीही नसतांना दोरीने गळफास घेवून आत्महत्या केल्याची धक्कादायक घटना बुधवारी २७ मार्च रोजी दुपारी १२ वाजेच्या सुमारास उघडकीला आला आहे. दरम्यान आत्महत्येस प्रवृत्त करणाऱ्यांना गुन्हा दाखल करून अटक करण्यात यावी अशी मागणी मयत तरूणाच्या नातेवाईकांनी केला आहे. याप्रकरणी जळगाव तालुका पोलीस ठाण्यात अकस्मात मृत्यूची नोंद करण्यात आली आहे.
मुकेश अर्जुन पाटील वय ३५ रा. चंदूअण्णा नगर,जळगाव असे मयत तरूणाचे नाव आहे. तो पत्नी आणि दोन मुलांसह वास्तव्याला होता. एम. जे. कॉलेज परिसरात आयएमपी कम्प्युटर इन्स्टिट्यूट चालवत होता. कोरोना काळात मुकेशने इन्स्टिट्यूट चालू ठेवण्यासाठी मोठ्या प्रमाणावर कर्ज घेतले होते. ओळखीच्या लवेश चव्हाण यांच्याकडून त्याने १ लाख २० हजार रुपये उसने घेतले होते. त्यापैकी ६५ हजार रुपये त्याने परतही केले होते. मात्र, उर्वरित रक्कम व्याजासह २ लाख ९५ हजार रुपयांवर पोहोचली होती. या रकमेच्या परतफेडीसाठी लवेश चव्हाण सतत तगादा लावत होता.
घटनेच्या दोन दिवस आधीच मुकेशने पत्नीला माहेरी पाठवले होते, त्यामुळे मुकेश हा घरी एकटाच होता. २६ मार्च रोजी सकाळी ११ वाजता लवेश चव्हाण आणि त्याचे ४-५ साथीदार मुकेशच्या घरी आले. त्यांनी मुकेशला शिवीगाळ करत धमकावले आणि त्याची दुचाकी जबरदस्तीने हिसकावून नेली. या प्रकारामुळे मुकेश मानसिक तणावात गेला आणि त्याने दुपारी १२ वाजता आपल्या राहत्या घरी गळफास घेऊन आत्महत्या केली.
पत्नीने वारंवार फोन केला, मात्र प्रतिसाद न मिळाल्याने तिने शेजाऱ्यांना कळवले. शेजाऱ्यांनी खिडकीतून पाहिले असता, मुकेशने गळफास घेतल्याचे लक्षात आले. तातडीने पोलिसांना आणि कुटुंबीयांना बोलावण्यात आले. घटनेची माहिती मिळताच कुटुंबीय व नातेवाईकांनी जिल्हा शासकीय वैद्यकीय महाविद्यालयात धाव घेतली. त्यांनी मोठ्या आवाजात आक्रोश करत, आत्महत्येस प्रवृत्त करणाऱ्यांवर कठोर कारवाई करण्याची मागणी केली. “जोपर्यंत आरोपींवर गुन्हा दाखल होत नाही, तोपर्यंत मृतदेह ताब्यात घेणार नाही,” असा पवित्रा कुटुंबीयांनी घेतला आहे.
