Home क्रीडा जळगावच्या हर्षाली विरकरची महाराष्ट्राच्या १७ वर्षांखालील मुलींच्या क्रिकेट संघात निवड 

जळगावच्या हर्षाली विरकरची महाराष्ट्राच्या १७ वर्षांखालील मुलींच्या क्रिकेट संघात निवड 

0
5

जळगाव-लाईव्ह ट्रेंड्स न्यूज प्रतिनिधी । जळगावच्या क्रीडा क्षेत्रासाठी अभिमानास्पद बातमी समोर आली आहे. येथील काशिनाथ पलोड पब्लिक स्कूलची इयत्ता आठवीतील विद्यार्थिनी कु. हर्षाली प्रशांत विरकर हिची महाराष्ट्राच्या १७ वर्षांखालील मुलींच्या क्रिकेट संघात निवड झाली आहे. जम्मू-काश्मीर येथे होणाऱ्या ७० व्या राष्ट्रीय शालेय क्रिकेट स्पर्धेत ती महाराष्ट्राचे प्रतिनिधित्व करणार आहे. तिच्या या निवडीमुळे जळगावच्या शिरपेचात आणखी एक मानाचा तुरा रोवला गेला असून, तिच्यावर सर्व स्तरांतून अभिनंदनाचा वर्षाव होत आहे.

हर्षाली सध्या महाराष्ट्र राज्याच्या १७ वर्षांखालील मुलींच्या क्रिकेट संघाच्या प्रशिक्षण शिबिरात सहभागी झाली असून, राष्ट्रीय स्पर्धेच्या दृष्टीने कसून सराव करीत आहे. भारतीय शालेय खेळ महासंघ (SGFI) यांच्या वतीने आयोजित करण्यात येणाऱ्या ७० व्या राष्ट्रीय शालेय स्पर्धेत तिला महाराष्ट्राकडून खेळण्याची संधी मिळाली आहे.ही राष्ट्रीय स्पर्धा १५ ते २२ नोव्हेंबर २०२६ या कालावधीत जम्मू-काश्मीर येथे आयोजित करण्यात आली आहे. देशातील विविध राज्यांतील निवडक संघ या स्पर्धेत सहभागी होणार असून, या राष्ट्रीय स्तरावरील स्पर्धेत हर्षालीला आपले क्रिकेट कौशल्य दाखविण्याची संधी मिळणार आहे.

हर्षाली ही जळगाव जिल्ह्याच्या १५ वर्षांखालील मुलींच्या क्रिकेट संघाची कर्णधार आहे. यापूर्वीही तिने क्रिकेटमधील आपल्या कामगिरीतून नेतृत्वगुण आणि खेळातील कौशल्य सिद्ध केले आहे. जळगाव येथील जैन स्पोर्ट्स अकॅडमीची ती खेळाडू असून, अकॅडमीमध्ये ती क्रिकेटचे प्रशिक्षण घेत आहे. सातत्यपूर्ण सराव, मेहनत आणि खेळाप्रती असलेली निष्ठा यामुळे तिने राज्याच्या १७ वर्षांखालील संघात स्थान मिळविण्याचा मान पटकावला आहे.

विशेष म्हणजे, इयत्ता आठवीत शिकत असतानाच राज्याच्या १७ वर्षांखालील संघात निवड होणे ही हर्षालीच्या क्रिकेट कारकिर्दीतील महत्त्वाची कामगिरी मानली जात आहे. जिल्ह्याच्या १५ वर्षांखालील संघाचे नेतृत्व केल्यानंतर आता राष्ट्रीय स्तरावर महाराष्ट्राचे प्रतिनिधित्व करण्याची संधी तिला मिळाली आहे. हर्षालीच्या या यशामुळे काशिनाथ पलोड पब्लिक स्कूल, जैन स्पोर्ट्स अकॅडमी आणि जळगावच्या क्रीडा क्षेत्रात आनंदाचे वातावरण आहे. तिच्या पुढील वाटचालीसाठी क्रीडाप्रेमी आणि नागरिकांकडून शुभेच्छा दिल्या जात आहेत.


Protected Content

Play sound