वरणगाव-लाईव्ह ट्रेंडस न्यूज प्रतिनिधी | ओम सिद्धगुरु नित्यानंद प्रतिष्ठान संचलित रेवा कुटी, वरणगाव येथे वासुदेव परिवारतर्फे हनुमान जन्मोत्सव मोठ्या भक्तिभावात आणि उत्साहात साजरा करण्यात आला. विविध धार्मिक उपक्रमांच्या माध्यमातून संपन्न झालेल्या या कार्यक्रमास भाविकांनी मोठ्या संख्येने हजेरी लावली.
कार्यक्रमाची सुरुवात सकाळी ३ वाजता गणेश आराधना आणि प्रभु श्रीराम स्तुतीने झाली. त्यानंतर हनुमान चालीसाच्या प्रत्येक ओवीचे सामूहिक पठण व हवन पार पडले. एकूण ११ वेळा असे एकूण ५०६ संगीतमय हनुमान चालीसा पठण करण्यात आले.
यावेळी रामनानंदजी जयस्वाल महाराज यांच्या समूहाने भावपूर्ण स्वरात सुंदरकांड पाठ केला. त्यांना संगीतकार आनंद कुमार, राजेश धुर्वे, कुणाल शिंदे आणि बुधाजी महाराज यांचे साथ लाभले.
कार्यक्रमात तुकाराम पाटील, वैशाली पाटील, पियुष महाजन, डॉ. अनिल शिंदे, डॉ. रवींद्र माळी, विवेक पाटील, डॉ. रेणुका पाटील, गजानन नाथजोगी, कपिल राणे यांच्यासह प्रीती व रुपाली महाजन, दीपक फेगडे, मनोज गोसावी, उमेश माळी, पार्थ महाजन, कमलेश येवले, डॉ. विशाखा बेंडाळे, ज्ञानेश्वर पाटील, चंद्रकांत बढे, दिनकर पाटील, प्रकाश पाटील, रामा शेटे, रत्ना पाटील आदी भाविक सहभागी झाले होते. कार्यक्रमानंतर प्रसाद भोजन आयोजित करण्यात आले होते.
राम सेतू दगडाचे दर्शन विशेष आकर्षण
कार्यक्रमात आलेल्या भाविकांसाठी प्रभू श्रीरामांच्या पदस्पर्शाने पावन झालेला राम सेतूचा दगड विशेष आकर्षण ठरला. पाण्यावर तरंगणारा हा पवित्र दगड ७ हजार वर्षांपूर्वीच्या रामायणकालीन इतिहासाशी जोडलेला आहे. हा दगड पाहून भाविक भावविभोर झाले.
“हा जन्मोत्सव भाविकांच्या मनात कायमचा कोरला जाईल,” असे मत दीपक फेगडे (सदस्य, वासुदेव परिवार) यांनी व्यक्त केले.
“भाविकांचा वाढता उत्साह संजीवनीसारखा” – पियुष महाजन
दर महिन्याच्या दुसऱ्या शनिवारी सुरू केलेल्या सांगीतिक हनुमान चालीसा पठणासाठी भाविकांची उपस्थिती दिवसेंदिवस वाढत आहे. “आमची जबाबदारीही त्यामुळे वाढली आहे. भाविकांचा हा उत्साह आम्हाला संजीवनीसारखा वाटतो. आगामी काळात आणखी व्यापक नियोजन करण्यात येईल,” असे प्रतिपादन पियुष महाजन (सदस्य, वासुदेव परिवार) यांनी केले.
कार्यक्रमाच्या यशस्वी आयोजनासाठी वासुदेव परिवाराने विशेष मेहनत घेतली असून दीपक फेगडे यांनी उपस्थितांचे आभार मानले.
