पारोळा-लाईव्ह ट्रेंड्स न्यूज प्रतिनिधी । पारोळा शहराच्या सुरक्षेच्या दृष्टीने महत्त्वपूर्ण ठरणारी नवी अद्ययावत अग्निशमन गाडी शासनाकडून पारोळा नगरपालिकेला प्राप्त झाली असून आमदार अमोल पाटील यांच्या हस्ते तिचे लोकार्पण उत्साहात पार पडले. शहराची वाढती लोकसंख्या, विस्तारत चाललेला नागरी परिसर आणि आपत्कालीन परिस्थितीत तातडीने मदत पोहोचविण्याची गरज लक्षात घेता पारोळ्यासाठी ही अग्निशमन गाडी मोठा दिलासा मानली जात आहे. या नव्या वाहनामुळे शहरातील अग्निशमन यंत्रणेला आधुनिक साधनसामग्रीची साथ मिळणार असून नागरिकांच्या सुरक्षेला अधिक बळकटी मिळणार आहे.
पारोळा शहरात गेल्या काही वर्षांत नागरी विस्तार झपाट्याने वाढत असून नवीन निवासी भाग, व्यापारी संकुले आणि विविध विकासकामांमुळे आपत्कालीन यंत्रणा अधिक सक्षम असण्याची गरज निर्माण झाली होती. विशेषतः आग लागणे, शॉर्टसर्किट, अपघात तसेच अन्य तातडीच्या घटनांमध्ये तत्काळ प्रतिसाद देण्यासाठी अद्ययावत अग्निशमन वाहनाची मागणी नागरिकांकडून सातत्याने होत होती. या पार्श्वभूमीवर शासनाकडून आधुनिक सुविधांनी सुसज्ज असलेली ही अग्निशमन गाडी पारोळा नगरपालिकेला प्राप्त झाल्याने नागरिकांमध्ये समाधान व्यक्त होत आहे.
या अग्निशमन गाडीला मंजुरी मिळवून देण्यासाठी आमदार अमोल पाटील यांनी सातत्याने पाठपुरावा केल्याचे सांगण्यात आले. स्थानिक पातळीवरील गरज शासन दरबारी प्रभावीपणे मांडत शहराच्या सुरक्षेचा प्रश्न प्राधान्याने हाताळल्यामुळे अखेर या प्रयत्नांना यश आले. त्यामुळे नगरपालिकेच्या अग्निशमन विभागाची कार्यक्षमता वाढण्यास मदत होणार असून भविष्यात आपत्कालीन परिस्थितीला अधिक वेगाने आणि प्रभावीपणे सामोरे जाणे शक्य होणार आहे.
नवीन अग्निशमन गाडीचे लोकार्पण आणि पूजन समारंभ आमदार अमोल पाटील यांच्या संपर्क कार्यालयात उत्साहपूर्ण वातावरणात पार पडला. यावेळी लोकनियुक्त नगराध्यक्ष चंद्रकांत पाटील यांची प्रमुख उपस्थिती होती. लोकार्पणावेळी उपस्थित मान्यवरांनी वाहनाचे पूजन करत शहराच्या सुरक्षिततेसाठी ते महत्त्वाचे पाऊल असल्याचे मत व्यक्त केले.
या कार्यक्रमाला शिवसेना शहरप्रमुख, गटनेते आणि नगरसेवक अमृत चौधरी, उपजिल्हाप्रमुख तथा नगरसेवक मनिषभाऊ पाटील, माजी उपनगराध्यक्ष सुदाम चौधरी, शिवसेना प्रतोद नितीन सोनार, नगरसेवक राजूभाऊ कासार, मनोजभाऊ जगदाळे, प्रमोदशेठ कासार, राजूबापू पाटील, बापू मिस्तरी, उपगटनेते तथा नगरसेवक पंकज मराठे, नगरसेवक नजीरखान बेलदार, इमरान शेख, गोपाल दाणेज, विनोद पाटील, दगडू पवार, संदेश शिरोळे, दीपक अनुष्ठान, भूषण टिपरे, बांधकाम व्यावसायिक पी. आर. वाणी, संजय गोसावी यांच्यासह नगरपालिकेचे आजी-माजी पदाधिकारी आणि अग्निशमन विभागातील कर्मचारी मोठ्या संख्येने उपस्थित होते.
नवीन अग्निशमन गाडी शहराच्या सेवेत दाखल झाल्यानंतर भविष्यात आग, दुर्घटना किंवा इतर आपत्कालीन प्रसंगी अधिक तत्परतेने मदतकार्य करणे शक्य होणार असल्याची भावना यावेळी उपस्थितांनी व्यक्त केली. नागरिकांच्या जीवित आणि मालमत्तेच्या सुरक्षेसाठी ही सुविधा अत्यंत उपयुक्त ठरेल, असा विश्वासही मान्यवरांनी व्यक्त केला.
