जळगाव लाईव्ह ट्रेंडस न्यूज प्रतिनिधी । दारू पिण्यासाठी पैसे दिले नाही या कारणावरून एका तरूणाला व त्याच्या वडीलांना बेल्टने मारहाण केली तर रस्त्यावरील दगड मारून दुखापत केल्याची घटना शनिवारी १५ मार्च रोजी पहाटे ५ वाजता मानराज पार्क येथे घडली आहे. याप्रकरणी दुपारी साडेबारा वाजता जिल्हापेठ पोलीस ठाण्यात अज्ञात व्यक्तीविरोधात गुन्हा दाखल करण्यात आला आहे.
याबाबत अधिक माहिती अशी की, संकेत किरण बाविस्कर वय २८ रा. गुड्डू राजा नगर, जळगाव हा तरूण आपल्या परिवारासह वास्तव्याला आहे. संकेत हा १३ मार्च रोजी पहाटे ५ वाजता पुणे ते जळगाव असा प्रवास करून मानराज पार्क येथे ट्रॅव्हल्सने उतरला. त्यावेळी संकेतचे वडील त्याला घेण्यासाठी आले होते. त्यानंतर दोघेजण दुचाकीवरून जात असतांना एक अज्ञात व्यक्तीने दोघांचा रस्ता आडविला आणि दारू पिण्यासाठी पैसे मागितले. पैसे दिले नाही म्हणून संकेत व त्याचे वडील किरण बाविस्कर यांना बेल्टने मारहाण केली तर रस्त्यावर पडलेला दगड मारून गंभीर दुखापत केली. ही घटना घडल्यानंतर संकेत बाविस्कर याने पोलीस ठाण्यात धाव घेवून तक्रार दिली. त्यानुसार दुपारी साडेबारा वाजता जिल्हापेठ पोलीस ठाण्यात गुन्हा दाखल करण्यात आला आहे. पुढील तपास पोहेकॉ नरेश सोनवणे हे करीत आहे.
